«ArselorMıttal Temirtaý» kompanııasynda qysqartýlar bolmaıdy - Eńbek mınıstri
QARAǴANDY. QazAqparat -Eńbek jáne halyqty áleýmettik qorǵaý mınıstri Tamara Dúısenova Qaraǵandyda «ArselorMıttal Temirtaý» AQ-nyń shahtalary men mettalýrgııalyq kombınatynda jappaı qysqartýlarǵa jol berilmeýi tıistigin málim etti, dep habarlaıdy «QazAqparat» HAA tilshisi.
Mınıstr qala quraýshy kásiporyndaǵy jaǵdaıǵa qatysty pikirin Qaraǵandy oblysynyń ákimdiginde ónerkásipti jańǵyrtýǵa baılanysty eńbek naryǵynda týyndaýy múmkin ózgerister boıynsha ótken keńeste bildirdi.
«ArselorMıttal Temirtaý» kompanııasy boıynsha eshqandaı qysqartýlar bolmaıdy, - dep keltiredi ákimdiktiń bapasóz qyzmeti Tamara Dúısenovanyń sózin. - Bir ǵana másele, 2050 jylǵa deıin kompanııada 6 myń jumysshy zeınettik jasqa tolady eken. Bul máseleni búgin talqyladyq. «ArselorMıttal Temirtaý» ózderine kadr daıarlaý úshin Qaraǵandy, Balqash jáne Qarajaldaǵy úsh kolledjdi óz basshylyǵyna alýdy usyndy. Kompanııa kolledjderdiń materıaldyq-tehnıkalyq bazasyn jaqsartýǵa 60 mıllıon teńge ınvestıtsııalaýǵa daıyn. Al «Qazaqmysta» 1 myń adam qysqartylýy múmkin. Bulardyń kópshiligi ákimshilik-basqarý mamandary. Olardy jumystan bosatý kezeń-kezeńimen júrgiziledi», - dep túsindirdi Tamara Dúısenova.
Eki kompanııa da jeltoqsannyń ortasyna deıin Jol kartasynyń sońǵy nusqasyn óńirlik shtabqa usynýy tıis. Mınıstr Memleket basshysynyń tapsyrmasymen jumys toby qurylǵanyn habarlady. Onyń quramyna mınıstrlikterdiń, «Atameken» ulttyq kásipkerler palatasynyń ókilderi kirgen.
