«ArselorMıttal Temirtaý» kompanııasyna naqty talaptar qoıyldy - Brekeshev

ASTANA. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev «ArselorMıttal Temirtaý» kompanııasyna ekologııa salasynda naqty talaptar qoıylyp otyrǵanyn aıtty, dep habarlaıdy QazAqparat tilshisi.

«Bizdiń maqsatymyz - «ArselorMıttal Temirtaýdyń» zıyndy shyǵaryndylaryn 2025 jylǵa deıin 20 paıyzǵa azaıtý. Osyǵan sáıkes bizge tapsyratyn qujattarynda olar naqty is-sharalardy kórsetýi tıis. Eger naqty sheshimderin eskermese, ekologııa salasyndaǵy ruqsat qujattaryn bermeımiz», - dedi S. Brekeshev Májilistegi Úkimet saǵatynan keıin tilshiler saýalyna jaýap bere otyryp.

Osy oraıda ol aldaǵy sársenbide Qaraǵandy oblysynyń turǵyndarymen kezdesetinin aıtty.

«Sapar aıasynda Temirtaýǵa baryp, úlken jınalys ótkizbekpiz. Onda «ArselorMıttal Temirtaýdyń» jáne ekologııa máseleleri kóteriledi», - dedi mınıstr.

Eske salsaq, Memleket basshysy «ArselorMıttal Temirtaý» kásipornynda apattar jıilep, qaıtalana beretin jaǵdaıǵa jetkenin aıtyp, kompanııaǵa tekserý júrgizý kerektigi týraly aıtqan bolatyn. Sonymen qatar «ArselorMıttal Temirtaý» kompanııasy Ekologııa, geologııa jáne tabıǵı rersýrstar mınıstrliginiń tekserýshilerin óz aýmaǵyna kirgizbeı qoıǵan.