«ArselorMıttal Temirtaý» kompanııasy 500 myń aǵash otyrǵyzýǵa mindetteldi

NUR-SULTAN. QazAqparat - Ekologııa mınıstrligi «ArselorMıttal Temirtaý» kompanııasyna Temirtaýda 500 myń aǵash otyrǵyzýdy mindettedi, dep habarlaıdy QazAqparat mınıstrliktiń baspasóz qyzmetine silteme jasap.

Bul týraly QR ekologııa, geologııa jáne tabıǵı resýrstar mınıstrligi uıymdastyrǵan brıfıng barysynda habarlandy. Mınıstrliktiń Ekologııalyq retteý jáne baqylaý komıtetiniń tóraǵasy Zulfuhar Joldasov «ArselorMıttal Temirtaý» AQ-daǵy jaqynda bolǵan avarııalyq jaǵdaıǵa qatysty aqparat berdi.

Komıtet basshysynyń sózine qaraǵanda, 19 aqpanda kompanııanyń konverter tsehtarynyń birinde tazartý jabdyqtarynyń jumysynda aqaýlar bolǵan. Osyǵan baılanysty bir saǵattyń ishinde búkil gaz kólemi qorshaǵan ortaǵa tazartýsyz kirdi. Aýmaqtyq ekologııa departamenti jedel túrde bul fakt boıynsha jospardan tys tekserý júrgizdi.

«Qazir bizdiń mamandar kásiporynda, tekserý júrgizilýde. Eń bastysy, biz kelesi máseleler boıynsha sharalar qabyldaımyz – ýaqtyly habarlamaý, normatıvterden asyp ketý, tazartý qurylystaryn paıdalanýdy buzý, saraptamadan aýytqý», - dep atap ótti komıtet tóraǵasy.

Ol sondaı-aq osy oqıǵaǵa baılanysty Ekologııa mınıstrliginiń basshysy Maǵzum Myrzaǵalıev «ArselorMıttal» kompanııasynyń vıtse-prezıdenti Vıjaı Goıal myrzamen kezdeskenin habarlady. Kezdesý barysynda mınıstr kásiporyn óndirisin ekologııalandyrý boıynsha naqty tapsyrmalar berdi. Atap aıtqanda, jańa ekologııalyq kodekske sáıkes eń ozyq qoljetimdi tehnologııalarǵa kóshýdi júzege asyrý, emıssııalar monıtorınginiń avtomattandyrylǵan júıesin engizý jáne Temirtaýda 500 myń aǵash otyrǵyzý.

Sonymen qatar, Zýlfýhar Joldasov «ArselorMıttal Temirtaý» jumysyndaǵy júıeli problemalardyń biri JEO-nyń eskirgen jabdyqtary bolyp tabylatynyn habarlady.

«Temirtaý-aýasy barynsha lastanǵan qala. Qazgıdromettiń málimetteri boıynsha 2 jyl ishinde lastaný deńgeıiniń 10 eseden astamǵa artýynyń 67 jaǵdaıy tirkeldi. Shyǵaryndylardyń negizgi úlesi «ArselorMıttal Temirtaýǵıı» tıesili. Júrgizilgen tekserýler kezinde kásiporynda shań boıynsha ruqsat etilgen normalardan 125 ese asyp ketý tirkeldi», - dedi spıker.

Zulfuhar Joldasov kompanııanyń tabıǵatty qorǵaý is-sharalary qaǵaz júzinde ǵana «jumys isteıtinin» atap ótti.

«Biz kompanııanyń tabıǵatty qorǵaý is-sharalarynyń tıimdiligin taldadyq. Máselen, sońǵy 5 jylda kásiporyn tabıǵatty qorǵaý is-sharalaryna 28 mlrd.teńge jumsady, nátıjesinde shyǵaryndylar tek 190 tonnaǵa ǵana tómendetildi, bul shyǵaryndylardyń jalpy kóleminiń 0,08%-y»,- dedi komıtet basshysy.

Eske salsaq, Ekologııa mınıstri «ArselorMıttal Temirtaý» basshylyǵyna óndiristi jańǵyrtý týraly shart qoıǵan edi.