«ArselorMıttal Temirtaý» kombınatynda eki jumysshy zardap shegip, bireýi qaza tapty
QARAǴANDY. QazAqparat - «ArselorMıttal Temirtaý» AQ metallýrgııalyq kombınatynda bir jumysshy qaza taýyp, eki adam zardap shekti, dep habarlady «QazAqparat» HAA tilshisi.
Qaıǵyly oqıǵa 18 maýsymda tańǵy saǵat 4.40-ta oryn aldy. Mán-jaıy belgisiz sebeptermen 1959 jyly týǵan gaz qyzmetkeri domen gazymen ýlanǵan. Eki jumysshy- Temirtaýdaǵy ortalyq aýrýhanaǵa jetkizildi.
Qaraǵandy oblysy densaýlyq saqtaý basqarmasy baspasóz qyzmetiniń derekterine sáıkes qazirgi sátte eki jumysshy aýrýhanadan shyqty.
«Eki er adamnyń jaǵdaıy birneshe saǵat baqylaýda boldy. Olar ózderin nashar sezinbegenderin jetkizdi. Aýrýhanada qalýǵa esh sebep joq», - dep habarlady densaýlyq saqtaý basqarmasynyń baspasóz qyzmetinde.
Kombınat basshylyǵy men polıtsııa oqıǵanyń mán-jaıyn anyqtaýda.
«Jazataıym oqıǵa óndiristik úderiske áser etken joq. Kombınat burynǵy rejimde jumys istep jatyr», - dep habarlady kombınattyń qabyldaý bólmesinde.
