«ArselorMıttal Temirtaýdyń» jańa ınvestory anyqtaldy

«ArselorMıttal Temirtaý» AQ memleket menshigine qaıtarý kelissózderi aıaqtaldy. AMT eki kásipornynyń quny 286 mln dollarǵa baǵalanǵan. Ónerkásip jáne qurylys mınıstri Qanat Sharlapaev jańa ınvestordyń kim ekenin málimdedi, dep habarlaıdy Kazinform.

Jańa ınvestor – qazaqstandyq bıznesmen Andreı Lavrentev. Ol 1979 jyly Almaty qalasynda dúnıege kelgen. «Allur Group» kompanııalar tobynyń Dırektorlar keńesiniń tóraǵasy, onyń quramynda «Agromashholdıng» jáne «SaryarqaAvtoProm» JShS bar. Kompanııalar toby Chevrolet, KIA, JAC jáne LADA avtobrendteriniń Qazaqstan aýmaǵyndaǵy resmı óndirýshisi jáne dıstrıbıýtory.

Eske sala ketsek, 28 qazan kúni túngi saǵat 02.33-te Qaraǵandy oblysyndaǵy Kostenko atyndaǵy shahtada órt tutanyp, artynan jarylys boldy. Jer astynda jumys istep jatqan 252 kenshiniń 206-sy óz betimen joǵary shyqty.

31 qazan kúni 45 kenshiniń denesi jáne qaza tapqan 46-shy adamnyń dene bólshekteri tabyldy.

Qaraǵandy óńirine barǵan Memleket basshysy Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi.

Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.

Kazinform agenttigi «ArselorMıttalTemirtaý» tarıhynda qandaı apattar bolǵanyna sholý jasaǵan edi.