ArselorMıttal bolat quıý jáne taý-ken aktıvterin jańǵyrtýǵa qomaqty qarajat salýdy josparlap otyr

NUR-SULTAN. QazAqparat – «ArselorMıttal» bolat quıý jáne taý-ken aktıvterin jańǵyrtýǵa qomaqty qarajat salýdy josparlap otyr. Bul týraly QR Premer-Mınıstri Álıhan Smaıylov pen kompanııanyń atqarýshy tóraǵasy Lakshmı Mıttaldyń kezdesýinde málim boldy, dep habarlaıdy QazAqparat Úkimettiń resmı saıtyna silteme jasap.

Taraptar kompanııanyń óndiristi jańǵyrtý jáne eńbek qaýipsizdigin arttyrý jónindegi josparlaryn, shyǵarylatyn ónimdi ishki naryqqa jáne kórshi elderge jetkizý máselelerin, sondaı-aq metall ónimderin qaıta balqytýdyń neǵurlym joǵary deńgeıine kóshý perspektıvalaryn talqylady.

Lakshmı Mıttal kompanııanyń aldaǵy jyldary bolat quıý jáne taý-ken aktıvterin jańǵyrtýǵa qomaqty qarajat salýdy josparlap otyrǵanyn habarlady. Sonymen qatar, qyzmetkerlerdi oqytý jáne olardyń qaýipsizdigin qamtamasyz etý máselelerine kóbirek kóńil bólý josparlanyp otyr.

Premer-Mınıstr óndiristiń qazirgi qarqynyn saqtap, shyǵarylatyn ónim nomenklatýrasyn keńeıtý jáne týyndaǵan máselelerdi sheshý boıynsha Indýstrııa jáne ınfraqurylymdyq damý mınıstrliginiń basshylyǵymen barynsha tyǵyz jumys isteý qajettigine nazar aýdardy.

«Ónerkásiptik qaýipsizdik óte mańyzdy másele bolǵandyqtan, oǵan erekshe nazar aýdarý kerek. Osyǵan baılanysty óndiristi damytý jáne qyzmetkerlerdi mamandandyrylǵan oqytý boıynsha kompanııanyń ınvestıtsııalyq josparlaryn quptaımyz», - dedi Álıhan Smaıylov.

Foto: primeminister.kz