«Arselor Mıttall Temirtaý» AQ-da aýany lastaýshy zattar normatıvten asyp ketken
ANA. 24 maýsym. QazAqparat /Aıdar Ospanalıev/ - Metallýrgııa salasynda aýanyń lastanýymen baılanysty quqyqbuzýshylyqtarǵa jol berilýde.
Bul týraly búgin Qorshaǵan ortany qorǵaý mınıstrliginiń keńeıtilgen alqa májilisinde málim boldy.
Atalmysh mınıstrliktiń Ekologııalyq retteý men baqylaý komıtetiniń tóraǵasy Saǵymbek Mutashevtiń sózine qaraǵanda, ótken jyldyń maýsym aıynda «Arselor Mıttall Temirtaý» aktsıonerlik qoǵamynyń Temirtaý metallýrgııalyq kombınatyna ekologııalyq tekserý júrgizilgen. Tekserý barysynda kombınatta tazartý qondyrǵylaryn durys paıdalanbaýdyń nátıjesinde lastaýshy zattar normatıvten asyp ketkendigi málim boldy. «Atalǵan quqyqbuzýshylyq úshin 800 myń teńgege aıyppul salynyp, zalaldy óteý úshin 142 myń teńgeniń talaby usynyldy. Zalal men aıyppul tolyq óndirilip alyndy», -dedi komıtet tóraǵasy.
Onyń aıtýynsha, Temirtaý metalýrgııalyq kombınaty tabıǵat qorǵaý is-sharalaryn der kezinde oryndamaýdy ádetke aınaldyryp barady. «Kombınattyń aımaqtyń áleýmettik, ekonomıkalyq turaqtylyǵyna aıtarlyqtaı áser etetindigin eskere kele, «Arselor Mıttall Temirtaý» aktsıonerlik qoǵamynyń basshylyǵy 2010 jyly tabıǵat qorǵaý is-sharalaryn oryndaý týraly kepildik mindetteme bergen. Osy mindettemelerdiń oryndalýy aǵymdaǵy jyldyń shilde aıynda tekseriletin bolady»,-dedi S.Mutashev.
