«Arselor Mıttal» Qazaqstan shahtalarynda qaıǵyly oqıǵalar bolmas úshin qoldan kelgenniń bárin jasaıdy - L. Mıttal
ASTANA. Jeltoqsannyń 3-i. QazAqparat /Ernur Aqanbaı/ - «Arselor Mıttal» kompanııasy Qazaqstan shahtalarynda qaıǵyly oqıǵalar bolmas úshin qoldan kelgenniń bárin jasaıdy jáne soǵan qol jetkizbeıinshe tynbaıdy.
Búgin Astanada ótken Ken-qazba ónerkásibindegi eńbek pen tehnıka qaýipsizdigin saqtaý máselelerine arnalǵan forýmda atalmysh kompanııa Dırektorlar keńesiniń tóraǵasy jáne Bas dırektory Lakshmı Mıttal osylaı málimdedi, dep habarlaıdy QazAqparat .
Onyń sózine qaraǵanda, eńbek pen tehnıka qaýipsizdigin saqtaý jónindegi baǵdarlamany jaqsartý kompanııanyń qashanda birinshi basymdyǵy bolyp tabylady. L. Mıttal alaıda eńbek pen tehnıka qaýipsizdigin saqtaýǵa birden qol jetkizý qıyn dúnıe ekenin atap kórsetti. Onyń pikirinshe, bul durys ınvestıtsııalaýǵa ǵana emes, sonymen birge tájirıbeni ózgertýmen, adamdardyń qaýipsizdikke qatysty kózqarasymen baılanysty dúnıeler. «Buǵan qol jetkizý uzaq ýaqytty alýy múmkin. Alaıda, biz osy baǵytta kún saıyn naqty qadamdar qabyldap jatyrmyz», dedi ol.
«Bizdiń personalymyzdyń densaýlyǵy men qaýipsizdigi bul orasan zor jaýapkershilik. «Arselor Mıttaldyń» tehnıka men eńbek qaýipsizdigin qamtamasyz etý jónindegi baǵdarlamasy sońǵy úsh jylda jaqsaryp keledi. Biz sońǵy eki jylda Qazaqstan shahtalaryna aıtarlyqtaı ınvestıtsııa saldyq. 2009 jyldy 2008 jylmen salystyratyn bolsaq, oqıǵalar kórsetkishi 46 paıyzǵa, jaraqat 24 paıyzǵa, qaıǵyly oqıǵalar 80 paıyzǵa tómendedi», dedi L. Mıttal.
