«ArsellorMıttal Temirtaý» aktıvterin qaıtarý kelisimi birneshe kózden qarjylandyrylady

Ónerkásip jáne qurylys mınıstri Qanat Sharlapaev Úkimet otyrysynan keıin ótip jatqan baspasóz konferentsııasynda «ArsellorMıttal Temirtaý» aktıvterin qaıtarý kelisimi birneshe kózden qarjylandyrylatynyn aıtty, dep habarlaıdy Kazinform agenttigi.

«Bul jaǵdaıda kelisimdi bıýdjettik nemese kvazımemlekettik sektordyń qatysy bolmaıtyndaı etip qurylymdaımyz. ıAǵnı, osy kelisimdi uıymdastyrýǵa qarjy tartamyz», - dedi ol BAQ ókiliniń suraǵyna bergen jaýabynda.

Aıtýynsha, kelisimdi uıymdastyrýshy kompanııa bekitilgen.

«Kelisimniń taraptary – Qazaqstan Respýblıkasy men «ArselorMıttal Temirtaý» kompanııasy. Qazaqstan tikeleı kelisimniń bir tarapy bola almaıdy. Qandaı da bir zańdy tulǵa bolýy kerek. Ony belgiledik. Qazir zańnamalyq jaǵyn pysyqtap jatyrmyz. Ol uıymdastyrýshynyń kim ekenin aıta almaımyn. Óıtkeni «Arselormen» qupııalyq týraly qujatqa qol qoıǵanbyz. Bul - 100 paıyz Qazaqstan Respýblıkasy baqylaıtyn kompanııa», - dedi Qanat Sharlapaev.

Sondaı-aq, ol kelisimniń sharttaryn naqty aıtýǵa haqysy joq ekenin aıtty.

«Áńgime aıtarlyqtaı eleýli tranzaktsııa týraly bolyp tur. Bul - kúrdeli protsedýra. Biz 32 myń adam jumys isteıtin iri kásiporyndardyń biri týraly aıtyp otyrmyz. Bizde osy kelisimdi uıymdastyrýdyń birneshe qarjylandyrý kózi bolady. Men qandaı da bir jerden qandaı da bir soma alamyz dep qarabaıyrlap aıta almaımyn. Memlekette ázirshe ol aqparatty ashyp aıtý múmkindigi joq. Óıtkeni bárimiz qupııalyq týraly kelisimge baǵynyshtymyz», - dedi Qanat Sharlapaev.