Aronovtar áýletiniń ІІO-daǵy jumys ótili 70 jyldan asady - Qaraǵandy
QARAǴANDY. QazAqparat - ishki ister organdarynda polıtseıler áýleti jıi kezdesedi. Ádette otbasylarda aǵa býynnyń tájirıbesi men bilimi mura retinde jastarǵa beriletin dástúr qalyptasqan. Jastar úlkenderdiń isin jalǵastyrǵan kezde, olardy qandaı qıyndyqtar men synaqtar kútip turǵanyn sezine biledi. «QazAqparat» tilshisi Halyqaralyq Otbasy kúni osyndaı bir áýlettiń otaǵasymen áńgimelesti.
Qaraǵandy qalasynyń Іshki ister bóliminiń bólimshelerinde balalary ózderiniń ákeleri men atalary sekildi óz ómirin ishki ister organdarynda arnaǵan kem degende otyzdan astam otbasy bar. Aronovtar otbasy da solardyń ishinde.
Bul áýlettiń otaǵasy Amanǵalı aǵanyń quqyq qorǵaý organdarynda 25 jyldyq tájirıbesi bar, minsiz qyzmeti úshin kóptegen medaldar men marapattarǵa ıe.
«Búgingi tańda bul sabaqtastyqty saqtaý jáne kóbeıtý óte mańyzdy. Dástúrdi saqtaý jas urpaqtyń boıynda adamgershilik pen patrıotızmdi damytady. Sondyqtan jastardy áýlettiń tarıhymen jáne olardyń jetistikterimen tanystyrý qajet. Polıtsııa qyzmetkerleriniń eńbegin kórsetý, osy mamandyqqa qyzyǵýshylyq týǵyzý kerek», - dedi Amanǵalı Aronov.
Osy áýlettiń ІІO-daǵy jalpy jumys ótili 70 jyldan asady. Aronovtar otbasynda 6 bala bar, olardyń úsheýi ákesiniń izin basyp keledi.
Ortańǵy qyzy Araıgúl ІІO 1994 jyldan bastap qyzmet atqarýda. Ol - polıtsııa podpolkovnıgi, Qaraǵandy qalasy polıtsııa basqarmasy shtabynyń aǵa ınspektory.
«Polıtsııa qyzmetkeri, eń aldymen adal, laıyqty bolýy kerek. Óz jumysyn sapaly oryndaý úshin ony súıe bilýi kerek. Kez kelgen polıtseıdiń jumysynda árdaıym qıyn sátter bolady, biraq mindetti túrde boıdaǵy úreıdi jeńip, esh nársege qaramastan alǵa jyljý kerek. Eger janyńda súıetin jáne árdaıym seni qoldaıtyn otbasy bolsa, kez kelgen qıyndyqtardy jeńe alamyz»,- deıdi Araıgúl Amanǵalıqyzy.
Kishi qyzy Aqmaral oblystyq PD qarjylyq qamtamasyz etý basqarmasynda jumys isteıdi.
Óziniń ómir jolyn tańdaý ýaqyty kelgende, Amanǵalı aǵanyń kenje uly Tilekjannyń esh kúmáni bolmaǵan – ol áý bastan kim bolatynyn bilgen. Onyń aldynda úlgi tutar jaqyndary boldy: ákesi men ápkesi. B. Beısenov atyndaǵy Qaraǵandy akademııasyn bitirgennen keıin Tilekjan túrli jedel qyzmetterde jumys istedi. Qazir polıtsııa kapıtany Tilekjan Aronov - Qaraǵandy oblysy ІІD Krımınaldyq polıtsııa basqarmasynyń jeke tulǵaǵa qarsy qylmystardy ashý bóliminiń aǵa jedel ýákili.
«Otbasy - bul kez kelgen adamnyń, onyń ishinde polıtseıdiń ómirindegi basty qoldaý. Men úshin ákem erekshe úlgi tutar tulǵa. Men polıtseıler otbasynda týyp-óstim, meniń kóz aldymda anam ákemizge onyń kúrdeli jumysynda óziniń qarym-qatynasymen, meıirimdiligimen jáne jaıdarly minezimen qıyn joldardan ótýge kómektesken. Eger meniń balalarym meniń izimdi bassa jáne bizdiń otbasylyq áýletimizdiń isin jalǵastyrsa, óte qýanamyn. Biraq bári jeke tańdaýyna baılanysty bolady, men olardyń kez kelgen bastamasyn qoldaımyn», - dedi Tilekjan Aronov.
