Arnaıy júıe 4 sýıtsıdtiń aldyn alýǵa múmkindik berdi - Qorǵanys mınıstrligi

ASTANA. QazAqparat – Qorǵanys mınıstrligi áskerdegi sarbazdardyń qaýipsizdigin qamtý baǵytynda qandaı sharalar qabyldap, iske asyryp jatyr? Bul suraqqa Qorǵanys vıtse-mınıstri Sultan Qamaletdınov jaýap berdi, dep habarlaıdy QazAqparat tilshisi.

«Áskerı mindetti óteý jol júrýden qaýipti emes dep oılaımyn. Adamdar qarýly kúshter qatarynan góri jol boıynda jıi mert bolady. Balany áskerge jiberýden úreılenýdiń qajeti joq. Bizde qaýipsizdikti qamtamasyz etý baǵytynda birneshe baǵdarlama bar. Mysaly, ata-analar komıteti bar, onyń ókilderi sarbazdardyń jaǵdaıymen tikeleı tanysa alady. Sondaı-aq, «seriktes» degen júıe iske qosylǵan. Ár sarbazdyń óz seriktesi, dosy bar, olar bir-birin qaraılap, baqylap júredi. Atalǵan praktıka 4 sýıtsıd faktisiniń aldyn alýǵa múmkindik berdi», - dedi Sultan Qamaletdınov Májilistiń kýlýarynda tilshilerge suhbat bere turyp.

Vıtse-mınıstrdiń málimetinshe, ár jeke quramdy táýlik boıy qadaǵalaıtyn beınebaqylaý kameralary ornatylǵan.

«Odan bólek, psıhologter jumys isteıdi. Olar sarbazdarmen turaqty túrde áńgime-dúken quryp, saýalnama júrgizip turady. Ótken jyldan bastap sarbazdarǵa ata-anasymen beınebaılanys arqyly sóılesýge ruqsat berildi. Sonymen qatar, komandıri chat arqyly ata-analarmen tikeleı baılanysta», - deıdi mınıstrdiń orynbasary.