Arnaıy jumys tobynyń ókilderi «Ózenmunaıgaz» qyzmetkerlerimen kezdesti
«QazMunaıGaz» kompanııasy taratqan aqparatqa qaraǵanda, otyrys kezinde jumys tobyn eki shaǵyn topqa bólý týraly sheshim qabyldandy. Birinshisi qarjy-sharýashylyq jáne satyp alý qyzmetin tekseredi, al ekinshi top asa ózekti máselelerdi anyqtaý maqsatynda fokýs toptarmen jáne jumys ujymdarymen kommýnıkatsııa ornatýǵa jaýapty bolady.
Keńes barysynda «Ózenmunaıgaz» AQ bas dırektory Nurdáýlet Qılybaı jumys toby óreskel zań buzýshylyqtardy anyqtaǵan jaǵdaıda kompanııada kadrlyq ózgerister júrgiziletinin atap ótti.
Sonymen qatar keńesten keıin «QazMunaıGaz» UK AQ ókilderi jergilikti jumysshylar arasynda saýalnama júrgizýge kiristi jáne kompanııanyń birqatar óndiristik nysanyn aralady.
Atap aıtqanda, jumys tobynyń músheleri hımııa jáne ekologııa basqarmasynda, sondaı-aq munaı aıdaý basqarmasynda boldy. Qyzmetkerler birqatar tehnıkalyq qondyrǵyny jańartý qajettiligi týraly aıtyp, bilikti kadrlardyń tapshylyǵy baryn jetkizdi.
«QazMunaıGaz» UK AQ ókilderi óz tarapynan «Ózenmunaıgaz» AQ kompanııasynyń eńbek jaǵdaıyn jaqsartý jáne ınfraqurylymyn jańartý boıynsha qajetti ózgerister engizýge daıyn ekendigin bildirdi.
Sol kúni jumys tobynyń jetekshisi, «QazMunaıGaz» UK AQ basqarma tóraǵasynyń orynbasary Dáýletjan Hasanov Jańaózendegi «BerÁli Mańǵystaý Company» mekemesiniń burynǵy qyzmetkerlerimen kezdesti. Kezdesýde D.Hasanov jalaqy men áleýmettik paketti saqtaı otyryp, «BerÁliniń» burynǵy qyzmetkerlerin jumysqa ornalastyrý jáne aldaǵy ýaqytta uzaq merzimdi eńbek sharttaryn jasasý jóninde usynystar aıtty.
Aıtylǵan sózderdi rastaý úshin kezdesýge qatysqandar tıisti hattamamen tanysyp shyqty.
Jalpy «Ózenmunaıgaz» AQ qyzmetin tekserý jumystary birneshe aptaǵa sozylatynyn atap ótemiz. Sondaı-aq jaqyn arada jumys toby 67 munaı óndirý jáne munaı servısi uıymdarynyń ujymdarymen kezdesetin bolady.
