Arnaıy joba barysynda Qazaqstan zańdary jemqorlyqqa qatysty saraptamadan ótkizildi
ASTANA. 25 mamyr. QazAqparat /Jasulan Amanbaıuly/ - Arnaıy joba barysynda Ortalyq Azııanyń Eýrazııa Qory, Táýelsiz jemqorlyqqa qarsy kúres keńesi Qazaqstan Respýblıkasynyń zańyndaǵy jemqorlyq áreketterine jol beretin olqylyqtar men shıkilikterdi anyqtaýǵa baǵyttalǵan saraptama júrgizdi.
Onyń qorytyndylary búgin Astanada «Jemqorlyqqa qarsy saraptama: qoǵam men Úkimettiń seriktestigin nyǵaıtý» atty dóńgelek ústel jumysy barysynda shyǵaryldy.
Bul joba Ortalyq Azııanyń Eýrazııa Qorynyń bastamasymen jasaldy. Oǵan Qazaqstandaǵy Fınlıandııa Elshiligi qarjy bólgen bolatyn. Jobanyń negizgi oryndaýshysy - Táýelsiz jemqorlyqqa qarsy kúres keńesi. Keńes byltyr naýryz aıynda jasaqtalǵan bolatyn. Joba aıasynda Keńes músheleri, azamattyq qoǵam músheleri, sarapshylar kóktem aılarynda Fınlıandııa, Estonııa, Moldova, Grýzııa elderine sapar jasap, olardyń jemqorlyqpen kúres sharalaryn baǵamdap qaıtqan bolatyn. Sapardyń negizgi maqsaty - atalmysh elderdiń jemqorlyqpen jáne paraqorlyqpen kúres salasyndaǵy aldyńǵy qatarly ádisteri men tájirıbelerin zerttep, olardyń bul tıimdi tájirıbelerin Qazaqstan jaǵdaıyna beıimdeý, olardy otandyq úlgige engizý.
Táýelsiz jemqorlyqqa qarsy kúres keńesiniń múshesi, Qazaqstandaǵy parlamentarızmdi damytý qorynyń prezıdenti Zaýresh Battalovanyń aıtýynsha, jemqorlyq sanyn azaıtý úshin Qazaqstan zańnamasyn jetildirý qajet. Zertteý barysynda osyndaı negizgi oı túıilgen.
«Jemqorlyqpen qur kúresý jetkilikti emes, eń bastysy onyń sebepterimen kúresý qajet. Halyqaralyq qaýymdastyq ókilderimen anyqtalǵandaı, zańnamanyń shıkiligi - Qazaqstandaǵy jemqorlyqtyń negizgi sebepteri bolyp otyr. Sebebi ol zańdar keıbir memlekettik organ qyzmetkerlerine zańdaǵy olqylyqtardy, shıkilikter men tolymsyz normalardy paıdalanyp, jemqorlyq áreketterge boı aldyrýyna jol beredi»,-deıdi ol.
Soǵan oraı, keńes mamandary Qazaqstandaǵy zańdar jemqorlyqqa qatysty saraptamadan ótýi tıis dep esepteıdi. Táýelsiz jemqorlyqqa qarsy kúres keńesi atalmysh joba aıasynda respýblıkanyń turǵyn úı sharýashylyǵy, densaýlyq saqtaý jáne bilim berý salalaryndaǵy zańnamalardy osyndaı saraptaýdan ótkizgen. Olardyń nátıjeleri dóńgelek ústel barysynda, kúnniń ekinshi jartysynda jarııalandy.
