Arnaıy jabdyqtalmaǵan jerde sýǵa túsken er adam Buqtyrmaǵa batyp ketti

ÓSKEMEN. QazAqparat – Shyǵys Qazaqstan oblysy Altaı aýdanynda arnaıy jabdyqtalmaǵan jerde sýǵa túsken er adam batyp ketti, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń habarlaýynsha, oqıǵa 4 maýsym kúni Altaı aýdany Prıbrejnyı kentindegi Buqtyrma sý qoımasynda bolǵan.

Sý qoımasynyń arnaıy jabdyqtalmaǵan ýchaskesinde shomylyp júrgen 48 jastaǵy azamat batyp ketti.

Oqıǵa ornyna jetken súńgýirler onyń denesin alyp shyqqan.

Beıresmı málimetke súıensek, er adam mas bolǵan.

«Óńirde aldaǵy kúnderi 41 gradýsqa deıin ystyq bolady. Turǵyndarǵa qutqarýshylardyń eskertýlerine nemquraıly qaramaı, saqtyq sharalaryn únemi qaperde ustaý kerektigin eskertemiz. Shomylý úshin tek jabdyqtalǵan jaǵajaılarǵa baryńyz. Qutqarýshylar men dárigerler kezekshilik etetin jerde qutqarý quraldary bar jáne sý qoımasynyń túbi tekserilgen. Eshbir jaǵdaıda balalardy jaǵalaýda qaraýsyz qaldyrmańyz», - delingen aqparatta.

Eske salsaq, bıyl Shyǵys Qazaqstan oblysynda shomylýǵa arnalǵan 21 ýchaske belgilengen.