Arnaıy úıretilgen ıtter esirtkini qalt jibermeıdi - QR UQK
ASTANA. QazAQparat - QR UQK Shekara qyzmetiniń «Soltústik» óńirlik basqarmasyna qarasty Pavlodar shekara otrıadynyń «Úrlitóbe avto» kóliktik shekaralyq baqylaý bólimshesinde (Qazaqstan - Reseı shekarasy) keshe shekara narıadynyń «Výlkan» atty arnaıy úıretilgen qyzmettik ıti elimizden Reseıge qaraı «Folksvagen» avtokóligimen bet alǵan, 1976 jyly týǵan Aleksandr esimdi azamattyń janynan aınalsoqtap, shyqpaı qoıdy. Ittiń bul qylyǵy - «júrginshiniń qaltasynda esirtki bar» degen belgi.
Shekarashynyń tórt aıaqty kómekshisi bul joly da qatelespepti. Atalmysh azamattyń sporttyq kúrteshesiniń qaltasynan 15 gramm «marıhýana» esirtkisi tabyldy.
Jalpy, esirtki tasymalynyń jolyn kesýde arnaıy úıretilgen ıtterdiń kómegi erekshe ekendigin atap ótken oryndy. Osy óńirlik basqarmanyń «Semeı» baqylaý-ótkizý beketiniń «Aýyl - temirjol» kóliktik shekaralyq baqylaý bólimshesinde ústimizdegi jyldyń 25 qazany kúni saǵat 17.25-te ıisshil ıt «Almaty - Novosıbırsk» baǵyty boıynsha júretin № 302 poıyzdyń ájethanasynda tyǵylǵan 80 gramm marıhýanany taýyp qana qoımaı, vagonnan sol esirtkiniń ıesin de anyqtap berdi. Ol 1989 jyly týǵan Andreı esimdi Qazaqstan azamaty bolyp shyqty, dep habarlaıdy QR UQK ShQ baspasóz qyzmeti.
