Arnaıy toptyń jaýyngeri 6060 jylǵa sottaldy
ASTANA. 14 naýryz. QazAqparat - Gvatemala soty Pedro Pımentel esimdi elıtalyq áskerı toptyń burynǵy múshesin 6060 jylǵa bas bostandyǵynan aıyrdy, dep habarlaıdy RIA Novostı.
Pımentel bul jazany 1982 jyly jasaǵan qylmysy úshin alyp otyr. Ol sol jyly óltirgen árbir adamy úshin 30 jyldy arqalady.
Bul jazasy týraly 55 jasar burynǵy áskerıge ótken dúısenbide Gvatemaladaǵy sot otyrysynda jarııa etildi. Bul sot elde 1960-1996 jyldar aralyǵynda jalǵasqan azamat soǵysyna qatysty júrgizilip otyr. 1982 jyldyń jeltoqsanynda dıktator Rıos Monttyń buıryǵymen Kaibiles dep atalatyn elıtalyq arnaıy jasaq Las Dos Erres aýylynyń 201 turǵynyn qyryp saldy. Qaza bolǵandardyń arasynda áıelder men balalar da bar. Derekter boıynsha, jaýyngerler olardy atyp, qylqyndyryp nemese balǵamen uryp óltirgen.
Las Dos Erreske 20 jaýynger jiberilgen. Olardyń negizgi tapsyrmasy solshyl kóterilisshiler tyǵyp otyrǵan áskerı qarý-jaraqty izdep tabý bolǵan. Sol qyrǵynǵa qatysqandardyń biri jasaq quramynda Pımenteldiń de bolǵanyn aıtyp bergen. Ony AQSh 2011 jyly óz eline ekstradıtsııalaǵan bolatyn.
Sot Pımenteldi árbir qurban úshin 30 jyldan jáne adamzatqa qarsy qylmysy úshin taǵy 30 jylǵa sottaǵan. Osylardyń barlyǵyn qosqanda, 6 myń jyldan asyp túsken. Pımentel osyndaı jazaǵa ushyraǵan atalmysh arnaıy jasaqtyń 5-shi múshesi. Onyń qarýlastary Karlos Karıs, Manýel Pop, Reıes Kolın Gýalıp jáne Danıel Martınes Ernandester ótken jyldyń tamyzynda túrmege toǵytylǵan bolatyn.
Mundaı jaza negizinen sımvolıkalyq bolyp tabylady. Gvatemala zańdary boıynsha qylmyskerdiń jazasy 50 jylǵa deıin qysqarýy múmkin. Biraq qylmysker ol kúnge jete ala ma, joq pa, ol jaǵy belgisiz.
