Arnaıy prokýrorlar ShQO-daǵy túzeý mekemesinde adamdardyń azaptalǵanyn dáleldedi

ASTANA. QazAqparat - Arnaıy prokýrorlar Shyǵys Qazaqstan oblysyndaǵy túzeý mekemesinde adamdardyń azaptalǵanyn rastady, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

Bspasóz qyzmetiniń málimetterine qaraǵanda, prokýratýra organdarynyń negizgi mindetteriniń biri - azaptaýdy joıý.

Qadaǵalaý organy tergeýdiń zańsyz ádisteri men sottalǵandarǵa qatygezdik kórsetkeni úshin kináli adamdardy jaýapqa tartady.

Bıylǵy aqpanda Bas prokýrordyń narazylyǵy boıynsha Joǵarǵy Sot Іshki ister mınıstrliginiń Shyǵys Qazaqstan oblysy boıynsha Qylmystyq-atqarý júıesi mekemesiniń jedel ýákili, polıtsııa qyzmetkeri M.-ǵa qatysty Shyǵys Qazaqstan oblystyq sotynyń apellıatsııalyq satysynyń aqtaý úkiminiń kúshin joıdy.

Buǵan deıin ony júıeli azaptaýdy uıymdastyrǵany úshin birinshi satydaǵy sot úsh jyl alty aıǵa bas bostandyǵynan aıyrǵan bolatyn.

Tergeý barysynda Bas prokýratýranyń arnaıy prokýrorlary mekemedegi burynǵy polıtsııa basshylyǵymen qylmystyq jazasyn ótep jatqan adamdarǵa azaptaý sharalary qoldanylǵany týraly naqty dálelder tapty.

Atap aıtqanda, polıtsııa qyzmetkeri M. ózine táýeldi jaǵdaılardaǵylarǵa basqa sottalǵandarǵa azaptaýdy qoldanýǵa nusqaý bergeni anyqtaldy. Sottalǵandardy jazany óteý rejımin buzýǵa jatpaıtyn áreketter úshin jazalaǵan.

Mysaly, sottalǵan adam jetkilikti qyrynbaǵany úshin nemese mekeme qyzmetkerleriniń aty men ákesiniń atyn umytyp ketkeni úshin qatań jazaǵa ushyraıtyn bolǵan.

«Búkil azaptaý protsesi beınekameraǵa jazyldy. Qazirgi ýaqytta burynǵy polıtsııa qyzmetkeri M. azaptaýdy uıymdastyrýshy retinde sottaldy. Mundaı faktilerdi anyqtaý jumystary jalǵasýda»,-delingen habarlamada.