Arnaıy operatsııa: Quqyq qorǵaý organdary qyzmetkerleri quramyna kirgen transulttyq qylmystyq top joıyldy
NUR-SULTAN. QazAqparat - Ulttyq qaýipsizdik komıteti men Іshki ister mınıstrligi asa qaýipti transulttyq qylmystyq topty joıdy, dep habarlaıdy QazAqparat QR UQK baspasóz qyzmetine silteme jasap.
«10 naýryzda Ulttyq qaýipsizdik komıteti Іshki ister mınıstrligimen birlesip Nur-Sultan, Almaty, Pavlodar jáne Semeı qalalarynda aýyr jáne asa aýyr qylmystar jasaýǵa qatysy bar uıymdasqan qylmystyq toptyń jolyn kesý boıynsha iri aýqymdy arnaıy operatsııa júrgizdi.
Ustalǵan toptyń 16 múshesi adam urlaý, bopsalaý, kisi óltirýge oqtalý, Shyǵys Qazaqstan oblysyndaǵy kásiporyndardyń birinen quramynda altyny bar shıkizatty urlaý jáne onyń QR sheginen tys kontrabandasy, sondaı-aq transulttyq qylmystyq top qurý jáne oǵan basshylyq jasaý aıyptary taǵylyp otyr», delingen habarlamada.
Komıtettiń habarlaýynsha, qylmystyq toptyń quramyna quqyq qorǵaý organdarynyń árekettegi jáne burynǵy qyzmetkerleri kirgen.
«Ustaý barysynda qaskúnemderden olardyń jasaǵan qylmystaryn rastaıtyn iri somadaǵy aqshalaı qarajat, materıaldyq qundylyqtar, baılanys quraldary jáne ózge de zattar tabylyp, alyndy. Jedel-tergeý is-sharalary jalǵasýda», delingen habarlamada.
