Arnaıy operatsııa: Kásipkerlerdi bopsalaǵan qylmystyq top ustaldy

ASTANA. QazAqparat - Aqmola oblysynda kásipkerlerden aqsha bopsalaýmen aınalysatyn uıymdasqan qylmystyq top músheleri ustaldy, dep habarlaıdy QazAqparat Polisia.kz silteme jasap.

Aqmola oblysyndaǵy arnaıy operatsııa nátıjesinde ІІM uıymdasqan qylmysqa qarsy kúres departamenti bólimsheleriniń qyzmetkerleri jergilikti kásipkerlerden aqsha bopsalaǵan qylmystyq toptyń 6 múshesin ustady.

«Qylmystyq toptyń qoqan-loqqy kórsetip, kúsh qoldaný arqyly jergilikti kásipkerlerdiń birinen 2,5 mln teńge bopsalap, onyń Subaru Outback avtokóligin tartyp alǵany anyqtaldy. Búgingi kúni ustalǵandardyń oblys aýmaǵynda birqatar uqsas qylmystar jasaýǵa qatysy bary belgili boldy. Jedel aqparat boıynsha buryn birneshe ret qylmystyq jaýapkershilikke tartylǵan kúdiktiler «urylar ıdeologııasyn» ustanyp, ony jastar arasynda nasıhattaǵan. Sondaı-aq top músheleri qarý qoldanyp, aqsha bopsalaǵan. Munda olar talap qoıý úshin jalǵan syltaýlardy qoldanǵan. Tintý barysynda olardan jábirlenýshilerdi qorqytý úshin qoldanylǵan esirtki, sýyq jáne atys qarýy tárkilendi», - delingen habarlamada.

Osy faktiler boıynsha QR QK-niń 194-babynyń 2-bóligimen «Bopsalaý» sotqa deıingi tergeý júrgizilýde. Kúdiktiler qamaýǵa alyndy. Tergeý jalǵasýda.