Arnaıy mektepti támamdaǵan balalar qandaı kedergilerge tap bolady
ASTANA. QazAqparat - Qazaqstanda arnaıy mektepti támamdaǵan balanyń bilimi týraly kýáliginde oqý ornynyń ataýyn kórsetpeý kerek. Bul týraly Senattyń Áleýmettik-mádenı damý jáne ǵylym komıtetiniń keńeıtilgen otyrysynda Májilis depýtaty Svetlana Bychkova aıtty, dep habarlaıdy QazAqparat tilshisi.
Búgingi otyrys barysynda balanyń quqyqtaryn qorǵaý jónindegi fýnktsııalardy júzege asyratyn uıymdardyń qyzmetine baılanysty máseleler boıynsha ózgerister men tolyqtyrýlar talqylandy.
S. Bychkovanyń aıtýynsha, zań jobasynda Ulttyq aldyn alý tetigimen bala quqyqtaryn qorǵaý boıynsha qyzmetterdi iske asyratyn barlyq uıymdarǵa taratý usynylýda. Bul óz kezeginde halyqaralyq talaptarda eskerilgen.
«Bizde keıbir uıymdar Ulttyq aldyn alý tetigimen qamtylmaǵan. Bul turǵyda balalardy qaıta tárbıeleý sharalary qamtylmaǵan uıymdarǵa qatysty bolyp otyr, ıaǵnı medıtsınalyq-áleýmettk uıymdar. Eskerilgen normalarǵa sáıkes, endi avtomatty túrde paıda bolǵan árbir uıym Ulttyq aldyn alý tetigin mandatymen qamtylady», - dedi depýtat.
Sonymen qatar ol arnaıy bilim berý uıymdarynda júrgen kámeletke tolmaǵandarǵa qatysty tańylatyn tańbalarǵa jol bermeý máselesine toqtaldy.
«Máselen, arnaıy mektepti támamdaǵan balanyń bilimi týraly kýáliginde onyń devıantty minez-qulyqty jetkinshekterge arnalǵan oqý ornyn aıaqtaǵany týraly kórsetiledi. Alaıda bul jaǵdaı stıgmatızatsııaǵa alyp keledi jáne balanyń aldaǵy ómirinde áleýmettenýine kedergi keltiredi», - dedi S. Bychkova.
