Arnaıy qyzmet Belgııa men Frantsııada terakt jasaýǵa daıyndalyp jatqany jaıly eskertti

BRıÝSSELЬ. QazAqparat - Belgııanyń arnaıy qyzmetteri Sırııadan «DAISh» lańkestik uıymynyń sodyrlar tobyn Eýropaǵa jibergenin, olar Belgııa men Frantsııada shabýyl jasaýdy josparlap otyrǵanyn aıtty. Eldiń barlyq quqyq qorǵaý organdaryna joldanǵan tıisti hattyń úzindilerin La Derniere Heure gazeti jarııalady.

Arnaıy qyzmet Belgııa men Frantsııada terakt jasaýǵa daıyndalyp jatqany jaıly eskertti

«DAISh» sodyrlary shamamen bir jarym apta buryn Túrkııa men Grekııa  arqyly qujatsyz Eýropaǵa jetý úshin Sırııadan ketti.  Bul adamdar ekige bólinýi múmkin: bireýleri Belgııaǵa, basqalary Frantsııaǵa eki-ekiden shabýyl jasaý úshin barýy yqtımal. Qolda bar aqparatqa sáıkes, olar qarýlanǵan», - dep habarlady belgııalyq kúsh qurylymdary.

Belgııada nysanaǵa Brıýsseldegi iri saýda ortalyǵy, amerıkandyq fastfýd jelisi meıramhanalarynyń biri nemese polıtseı ýchaskesi iligýi múmkin ekeni aıtyldy.

Gazet  OCAM (Belgııanyń ІІM janyndaǵy qaýipke taldaý jasaý jónindegi úılestirý ortalyǵy) basshysy Pol van Tıghelttiń sózderin keltirdi.

«OCAM túrli aqparat alyp jatyr. Kóp jaǵdaıda ol tekserilmegen bolady. Bizdiń mindetimiz áriptesterimizdi eskertý, túsip jatqan aqparattardy saraptaý jáne tekserý.  Qazirgi jaǵdaıda qaýip deńgeıin kóterý qajet emes dep oılaımyz», - dedi Pol van Tıghelt.