Arnaıy qorǵaý jáne dempıngke qarsy sharalar týraly zań qabyldandy - Senat
ASTANA. QazAqparat - Búgin Parlament Senatynyń jalpy otyrysynda «Úshinshi elderge qatysty arnaıy qorǵaý, dempıngke qarsy jáne ótemaqy sharalary týraly» Zań qabyldandy.
Atalǵan qujat ulttyq zańnama normalaryn Keden odaǵynyń sharttyq-quqyqtyq bazasyn qalyptastyratyn, qol qoıylǵan jáne ratıfıkatsııalanǵan halyqaralyq kelisimdermen jáne Dúnıejúzilik saýda uıymynyń kelisimderimen sáıkestendirý maqsatynda ázirlengen. Toqtala ketetin jaıt, Qazaqstannyń qoldanystaǵy zańnama normalary tutastaı alǵanda qabyldanǵan halyqaralyq tájirıbege saı keledi. Alaıda Kedendik odaq jaǵdaıynda arnaıy qorǵaý, dempıngke qarsy jáne ótemaqy sharalaryn qoldaný tujyrymdamasy da ózgeriske ushyraǵan. Osyǵan oraı, zań jobasynda arnaıy qorǵaý, dempıngke qarsy jáne ótemaqy sharalaryn qoldanýdyń jalpy qaǵıdattary qamtylyp otyr. Budan bólek, qujat quqyqtyq olqylyqtardy joıý maqsatynda Eýrazııalyq ekonomıkalyq komıssııamen ózara is-qımyl jasaýǵa ýákiletti memlekettik organnyń basqa memlekettik organdardan alynǵan qupııa aqparatty memleketústilik organmen jáne halyqaralyq uıymdarmen almasý nemese berý máselesin retteý joldary usynylǵan. Bul rette «Ákimshilik quqyq buzýshylyq týraly» kodeksine arnaıy, dempıngke qarsy jáne ótemaqy bajdaryn tóleýden bosatý úshin nemese olardyń mólsherin azaıtý úshin negiz bolatyn durys emes málimetterdi málimdegeni úshin, arnaıy, dempıngke qarsy jáne ótemaqy bajdaryn tóleý merzimin buzǵany úshin jaýaptylyqty anyqtaý bóliginde tolyqtyrý engizý usynylýda. Tutastaı alǵanda, qujatty qabyldaý arnaıy qorǵaý, dempıngke qarsy jáne ótemaqy sharalaryn qoldaný salasynda Keden odaǵyn qalyptastyrý sheńberinde qabyldanǵan mindettemelerdi oryndaýǵa, ulttyq zańnama normalaryn DSU kelisimderine jáne Eýrazııalyq ekonomıkalyq odaq týraly shartpen sáıkes keltirýge múmkindik beredi.
