Arnaıy komıssııa Іle Alataýynda daýyl qulatqan aǵashtardan tazartý ýchaskelerin anyqtaıtyn bolady
ASTANA. 2 qyrkúıek. QazAqparat /Qanat Mámetqazyuly/ - Aýyl sharýashylyǵy mınıstrligi Іle Alataýy memlekettik ulttyq tabıǵat parkin aǵymdaǵy jyldyń 17 mamyry kúni daýyl qulatqan aǵashtardan tazartý jumystaryn júrgizýde.
Osy jumystardy atqarý maqsatynda qurylǵan komıssııa 5 qyrkúıekke deıin qulaǵan aǵashtardy tazartýǵa bolatyn ýchaskelerdi anyqtaıdy. Bul týraly mınıstrliktiń baspasóz qyzmetinen habarlandy.
Málimetterge súıensek, Іle Alataýy memlekettik ulttyq tabıǵı parki men «Medeý» memlekettik óńirlik tabıǵı parkinde jalpy kólemi 480 gektar orman aǵashtary qulaǵan. Daýyl men jeldiń saldarynan kelgen zalal 139,8 mln. teńgeni qurap otyr. Al qulaǵan aǵash ýchaskeleriniń barlyǵy derlik qıyn jerlerde ornalasqan, bul betkeıdiń qııa jerleri soltústik jaǵynda 30 gradýstan 45 gradýsqa deıin jetedi.
«Eńbek qaýipsizdigi standarttarynyń júıesi. Aǵash daıyndaý jumystary. Qaýipsizdik talaptary» memleketaralyq standartyna sáıkes taý betkeılerinde qulap jatqan aǵashtardy butarlaýǵa bolmaıdy jáne yldıda aǵashtardy qol jáne motorly aramen qulatýǵa jol berilmeıdi. Osy standartqa sáıkes 30 gradýstan asatyn yldıdaǵy kespe aǵashtardy súrekti tikushaqtarmen tasymaldaý kózdeledi. Daýyl men jel qulatqan aǵashtardyń ornyn tazartý jumystaryn júrgizý jaz kezinde tik taý betkeılerinde qunarly topyraq qabatynyń sydyrylýyna, munyń topyraq erozııasyn týǵyzýyna baılanysty qıyndap otyr. Osyǵan baılanysty Aýyl sharýashylyǵy mınıstrligi Tótenshe jaǵdaılar mnıstrligi men Qazselqorǵaý ókilderin qatystyra otyryp, arnaıy komıssııa qurǵan bolatyn. Komıssııa 5 qyrkúıekke deıingi merzimde qulaǵan aǵashtardy dástúrli tásilmen tazartýǵa bolatyn ýchaskelerdi, tikushaqtardy paıdalanyp tazartýǵa bolatyn ýchaskelerdi jáne qaýipsizdik tehnıkasynyń sharttary boıynsha tazartý múmkin emes ýchaskelerdi anyqtaıdy», - delingen baspasóz aıǵaǵynda.
Qazirgi kezde Іle Alataýy memlekettik ulttyq tabıǵı parkin daýyl qulatqan aǵashtardan tazartý jumystaryna 416 adamnan turatyn 37 brıgada, onyń ishinde butaqtar shabýmen aınalysyp jatqan QR TJM batalonynyń 175 adamy, Іle Alataýy parkiniń 36 adamy jáne 205 aǵash daıyndaýshylar jumyldyrylǵan. 119 mashına jumys isteýde.
