Arnaıy komıssııa dári-dármek jetispeýshiliginiń sebepterin anyqtaıtyn bolady - BQO
ORAL. QazAqparat - Arnaıy komıssııa dári-dármek jetispeýshiliginiń sebepterin tolyq anyqtaıtyn bolady. Bul týraly búgin óńirlik kommýnıkatsııalar qyzmeti alańynda ótken brıfıngte aıtyldy, dep habarlaıdy QazAqparat tilshisi.
Batys Qazaqstanda budan buryn ınsýlınge táýeldi balalarǵa qatysty dári-dármektiń ýaqtyly jetkizilmeı otyrǵany týraly ata-analar oblystyq densaýlyq saqtaý basqarmasyna kelip, shaǵymdanǵan bolatyn. Sonymen qatar qaterli isik, epılepsııa sııaqty aýrýlarmen naýqastanatyn turǵyndarǵa da dári-dármektiń jetispeı otyrǵany sóz bolǵan edi.
Brıfıngke qatysqan QR Densaýlyq saqtaý mınıstrligi Farmatsııa komıtetiniń tóraıymy Lıýdmıla Bıýrabekova dári-dármekke baılanysty mundaı jaǵdaıdyń qalyptasý sebepterin túsindirdi.
Onyń aıtýynsha, 2018 jylǵy 1 qańtardan bastap dári-dármekpen qamtý ortalyqtandyrylǵan túrde «SK-Farmatsııa» JShS arqyly júrgiziletin bolyp sheshildi. Osyǵan oraı zań men zańdyq aktilerdiń qabyldanýyna baılanysty 2018 jylǵa satyp alý rásimderi ádettegiden kesh ótti.
Jaǵdaıdyń kúrdelenýine baılanysty ótken jylǵy jeltoqsanda Úkimet dári-dármek satyp alý erejesine ózgerister engizý jóninde sheshim qabyldady. Bul «SK-Farmatsııa» mekemesine 90 kúndik qajettilikti bir kózden satyp alýǵa múmkindik beredi.
«Barlyǵy elýdeı tenderlik ótinish qaraldy, qazir de túsip jatyr. Tenderlik komıssııa tezirek qorytyndy shyǵaryp, ónim jetkizýshilermen baǵany tómendetý baǵytynda kelissóz júrgizý úshin demalyssyz jumys jasady. Biz qazirdiń ózinde biryńǵaı dıstrıbıýtor tizimin jasaýǵa kiristik. Qoldanystaǵy zańnamaǵa sáıkes tizim bıylǵy 1 maýsymǵa deıin bekitilýi tıis. Sodan keıin medıtsına uıymdarynan jınalǵan barlyq ótinishter negizinde biryńǵaı dıstrıbıýtor dári-dármek satyp alýdy bastaıdy. Aldaǵy jyly irkilisti boldyrmas úshin satyp alýdy shilde-tamyz aılarynda ótkizý kózdelýde», dedi komıtet tóraıymy.
«SK-Farmatsııa» basqarma tóraıymynyń mindetin atqarýshy Sharııa Ismuhanova qazirgi tańda biryńǵaı dıstrıbıýtor tizimi boıynsha 1040 túrli dári-dármek quraldarynyń satyp alynǵanyn jetkizdi. Bul - medıtsına uıymdary qajettiliginiń 95 paıyzy. Tizimde barlyǵy 1192 dári-dármek bar.
Onyń sózine qaraǵanda, Batys Qazaqstan oblysynda kúni búgin barlyq kerekti dári-dármek bar. Qańtar, aqpandaǵy qajettilik boıynsha dári-dármek tolyq jóneltilse, naýryz aıyndaǵysyn dárihanalarǵa, odan emdelýshilerge jiberý jalǵasýda.
Brıfıngte málim bolǵanyndaı, Densaýlyq saqtaý mınıstrligi ár óńirde dári-dármektiń emdelýshilerge jetkizilýin qadaǵalaıtyn monıtorıngtik top qurdy. Monıtorıngtik top tekserý júrgizgen kezde emdelýshilerdiń 86 paıyzy ǵana tıisti dári-dármekke qol jetkizgeni anyqtaldy. Derekqorda emdelýshiniń dári-dármekti alǵany kórsetilse de, shyn máninde onyń qolyna tımegen jaǵdaılar kezdesti. Sondyqtan tolyq, jan-jaqty tekserý júrgizý maqsatynda arnaıy top bir aı kóleminde Batys Qazaqstannan bastap barlyq oblysta bolmaq. Sodan keıin naqty qorytyndysy habarlanady.
