Arnaıy komıssııa Almaty áýejaıynda bolǵan oqıǵanyń sebebin anyqtady
ASTANA. QazAqparat - QR Investıtsııalar jáne damý mınıstrliginde qurylǵan komıssııa 2017 jyldyń 9-jeltoqsany kúni Almaty áýejaıynda «Air Astana» AQ-na qarasty Boeing-767-300ER áýe kemesimen bolǵan avıatsııalyq oqıǵaǵa qatysty jumysyn aıaqtady. Bul týraly Investıtsııalar jáne damý mınıstrliginiń baspasóz qyzmeti habarlady.
Bul oqıǵany obektıvti túrde tergeý maqsatynda Memleketaralyq avıatsııa komıtetiniń ushý qaýipsizdigin ǵylymı-tehnıkalyq qamtamasyz etý jónindegi sarapshylary taldaý jasady.
Boıng-767-300ER áýe kemesimen bolǵan avıatsııalyq oqıǵany tergeý qorytyndysy boıynsha oqıǵanyń oryn alýyna ekıpajdyń talapqa saı áreket etpeýi sebep bolyp otyr. Atap aıtqanda, kólikti buryp bolǵan soń qozǵaltqyshtyń jumys rejıminiń joǵary aınalymyn jónsiz kóterý men ekpindi rejımde jumys istep turǵan (39,5%) qozǵaltqyshpen tejegishti bir ýaqytta durys qoldanbaý ushaqtyń ekpinin kúsheıtýge alyp kelgen. Sonymen qatar, ushar aldynda dıspetcherdiń aqparatyna nazar aýdarmaý da jaısyz oqıǵaǵa sebep bolǵan.
Sondaı-aq, ushý úshin aerodrom mınımýmyn bilmeýi, áýe kemesiniń kabınasynda operatorlyq qyzmetke nazar aýdarmaı, dıspetchermen qajet bolmasa da kóp sóılesý, ushar aldyndaǵy daıyndyqtyń sapasyz bolýy áýek kóligin durys basqarý isine kedergi bolǵan.
Tergeý komıssııasy aldaǵy ýaqytta osyndaı avıatsııalyq oqys oqıǵalardyń aldyn alý, boldyrmaý maqsatynda Qazaqstan Respýblıkasyndaǵy áýe kemelerin paıdalanýshylarǵa eskertý sharalaryn usyndy.
Eske sala keteıik, Qazaqstan Respýblıkasy Investıtsııalar jáne damý mınıstriniń 2017 jyldyń 27 shildedegi №505 buıryǵymen bekitilgen avıatsııalyq oqıǵalar men oqys oqıǵalardy tergeý Erjesine sáıkes, joǵaryda atalǵan avıatsııalyq oqıǵaǵa baılanysty 2017 jyldyń jeltoqsanynda Komıssııa qurylyp, tergeý júrgizildi.
