Arnaıy HQO qyzmetkeriniń ustalýyna qatysty túsinikteme berdi

NUR-SULTAN. QazAqparat - «Azamattarǵa arnalǵan úkimet» memlekettik korporatsııasy Arnaıy halyqqa qyzmet kórsetý ortalyǵy qyzmetkeriniń ustalýyna qatysty resmı túsinikteme berdi, dep habarlaıdy QazAqparat tilshisi.

«Memlekettik korporatsııa sybaılas jemqorlyq quqyq buzýshylyqtardy joıý saıasatyn ustanady. Memlekettik korporatsııanyń Іshki qaýipsizdik basqarmasy turaqty negizde ishki aýdıt nátıjeleri boıynsha qyzmetkerler tarapynan zańsyz áreketterdi anyqtaıdy. Jınalǵan barlyq materıaldy Іshki qaýipsizdik departamenti odan ári tergeý úshin quqyq qorǵaý organdaryna tapsyrady», - dep habarlady atalǵan korporatsııadan.

Memlekettik korporatsııanyń qoǵammen baılanys jónindegi basqarýshy dırektory Narıman Dúsekeevtiń atap ótýinshe, 2022 jyldyń 6 aıynda departament Sybaılas jemqorlyqqa qarsy qyzmet pen múddeli quqyq qorǵaý organdaryna kólik quraldaryn qaıta tirkeýge jáne júrgizýshi kýálikterin berýge qatysty zań buzýshylyqtar týraly 33 hat joldaǵan.

«Ustalǵan qyzmetkerge kelsek, onyń áreketine ýákiletti organdar quqyqtyq baǵa beredi», - dedi Narıman Dúısekeev.

Buǵan deıin Nur-Sultan qalasy boıynsha Sybaılas jemqorlyqqa qarsy is-qımyl qyzmeti sotqa deıingi tergep-tekserý sharalary kezinde Arnaıy halyqqa qyzmet kórsetý ortalyqtary men polıtsııa qyzmetkerleriniń memlekettik tirkeýden ótken kólik quraldaryn tirkeý kezinde zańsyz baıýdyń qylmystyq shemasyn áshkerelep, jolyn keskenin habarlaǵan edik.