Arnaıy ekonomıkalyq aımaqtarda ınvestıtsııalyq ofıtser laýazymy engizilmek

NUR-SULTAN. QazAqparat – Arnaıy ekonomıkalyq aımaqtarda ınvestıtsııalyq ofıtser laýazymy engizilmek. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Memleket basshysynyń «Arnaıy ekonomıkalyq aımaqtar men olardyń basqarýshy kompanııalary qyzmetiniń tıimdiligin arttyrý jóninde sharalar qabyldaý» tapsyrmasyn iske asyrý úshin arnaıy ekonomıkalyq aımaqtardyń tıimdiligine taldaý júrgizildi. Tıisti jol kartasy ázirlendi. Sondaı-aq qoldanystaǵy zańǵa túzetýler toptamasy daıyndaldy», - dedi mınıstr.

Onyń atap ótýinshe, ınvestıtsııalardyń kólemine, salyq túrlerine jáne ónimniń kúrdeliligine baılanysty jeńildikter merzimderin saralaý, arnaıy ekonomıkalyq aımaqtar qatysýshylarynyń ózine alǵan barlyq mindettemelerdi oryndaý shartymen shart merzimi aıaqtalǵannan keıin jer ýchaskesin satyp alý múmkindigin belgileý, jumyldyrylǵan memlekettik organdar men uıymdardyń róli men jaýapkershiligin kúsheıtý, basym baǵyttardy aıqyndaý jónindegi tásilderdi qaıta qaraý zańnamalyq deńgeıde usynylady. Bul zańnamalyq bastamalar barlyq kelisý rásimderinen keıin Úkimetke engiziledi.

«Basqarýshy kompanııalardyń kadrlyq quramyn nyǵaıtý maqsatynda mynalardy usynamyz. Birinshiden -ınvestıtsııalyq ofıtser laýazymyn engizý. Ekinshiden - Dırektorlar keńesiniń quramyna ınvestıtsııalar tartý salasynda tájirıbesi bar táýelsiz dırektorlar, sondaı-aq «KAZAKH INVEST» UK» AQ óńirlik ókilderin engizý. Úshinshiden - tabysty sheteldik Arnaıy ekonomıkalyq aımaqtarda biliktilikti arttyrý kýrstaryn jáne taǵylymdamalardy uıymdastyrý.

«Sondaı-aq biz basqarýshy kompanııalar tıimdiliginiń negizgi kórsetkishterin qaıta qaraýdy josparlap otyrmyz»,- dedi Qaıyrbek Óskenbaev.