Arnaıy ekonomıkalyq aımaqtarda 2019 jylǵa deıin 2 trln teńgeniń jobalary júzege asady - Á. Isekeshev
ASTANA. QazAqparat - Arnaıy ekonomıkalyq aımaqtarda 2019 jylǵa deıin 2 trln teńgeniń jobalary júzege asady. Bul týraly búgin Májilistiń jalpy otyrysynda Investıtsııalar jáne damý mınıstri Áset Isekeshev málim etti.
Aıta keterligi jalpy otyrysta «Qazaqstan Respýblıkasynyń keıbir zańnamalyq aktilerine arnaıy ekonomıkalyq aımaqtardy jetildirý máseleleri boıynsha ózgerister men tolyqtyrý engizý týraly» zań jobasy talqylanǵan bolatyn.
«Búgngi kúni elimizdi on ekonomıkalyq aımaq bar. Indýstrııalandyrý baǵdarlamasynyń alǵashqy besjyldyǵy ishinde olardyń ınfraqurylymy tolyq qalyptasty. Nátıjesinde ınvestorlardyń belsendiligi artyp, jobalardyń sany da kóbeıdi», - dedi mınıstr Áset Isekeshev.
Onyń aıtýynsha qaralyp otyrǵan zań jobasy arqyly arnaıy ekonomıkalyq aımaqta basqarý júıesin jetildirip, ınvestıtsııalyq ahýaldy arttyrý kózdeledi.
«Indýstrııalandyrýdyń birinshi besjyldyǵy aıasynda arnaıy ekonomıkalyq aımaqtardyń barlyǵynda ınfraqurylym jasaqtaý qolǵa alyndy nemese olardyń birazynda bul jumys aıaqtalý satysynda tur. 2019 jylǵa qaraı Atyraý men Pavlodar arnaıy ekonomıkalyq aımaqtarynda ınfraqurylym tolyq júzege asady. Osynyń arqasynda AEA (arnaıy ekonomıkalyq aımaqtar) jobalarmen tolyǵa túspek. Qazirgi tańda AEA-tarda naqty 130 joba júzege asýda, sondaı-aq 90-nan astam jobamen jumys belsendi túrde júrgizilýde. Mysalǵa alsaq, 2009 jyly arnaıy ekonomıkalyq aımaqtardaǵy jobalar sany 20-ǵa jetpeıtin edi. Óıtkeni, ol tusta qajetti ınfraqurylym da bolmady, arnaıy ekonomıkalyq aımaqtardy basqarý jaǵy da álsiz boldy», - dedi Áset Isekeshev.
Mınıstrdiń sózine qaraǵanda, AEA ınfraqurylymyna Ulttyq qor men bıýdjetten bólingen qarajat 261 mlrd teńgeni qurady. Al qazirge deıin salynǵan ınvestıtsııalar mólsheri 375 mlrd teńgege jetip otyr.
«Budan bólek, 2019 jylǵa deıin jeke ınvestıtsııalar boıynsha shamamen 2 trıllıon teńgeni quraıtyn jobalar júzege asyrylmaq. Al mundaǵy búgingi óndiris kólemi 816 mln. teńgege jetip, 9 myń 230 jumys orny ashylyp otyr», - dedi mınıstr.
