Arnaıy ekonomıkalyq aımaqtar ındýstrııalandyrýdyń ekinshi besjyldyǵynda ósim núktesine aınalýy tıis - Á. Isekeshev
ASTANA. QazAqparat - Arnaıy ekonomıkalyq aımaqtar ındýstrııalandyrýdyń ekinshi besjyldyǵynda ósim núktesine aınalýy tıis. Bul týraly búgin Májilistiń jalpy otyrysynda Investıtsııalar jáne damý mınıstri Áset Isekeshev málim etti. Aıta keteıik, jalpy otyrysta «Qazaqstan Respýblıkasynyń keıbir zańnamalyq aktilerine arnaıy ekonomıkalyq aımaqtardy jetildirý máseleleri boıynsha ózgerister men tolyqtyrý engizý týraly» zań jobasy birinshi oqylymda maquldandy.
«Ekonomıkalyq klımatty jaqsartýǵa baǵyttalǵan «Nurly jol» jańa ekonomıkalyq saıasaty aıasynda, sondaı-aq, álemdik jaǵymsyz ekonomıkalyq ahýal saldarynan damýshy elderden ınvestıtsııalardyń ketýi yqtımaldyǵynyń artýyna qaraı arnaıy ekonomıkalyq aımaqtar qyzmetin jetildirý mańyzdy bolyp tabylady.
Sondyqtan da, ındýstrııalandyrýdyń ekinshi besjyldyq kezeńinde arnaıy ekonomıkalyq aımaqtar ósim núktesine aınalýy tıis. Sonymen qatar, daıyn ınfraqurylymdar nátıjesinde AEA sheteldik ınvestorlar úshin jaǵymdy habqa aınala túsýi kerek», - dedi mınıstr Áset Isekeshev.
Onyń aıtýynsha, osy maqsatta arnaıy ekonomıkalyq aımaqtar qyzmetin jetildirý úshin arnaıy zań jobasy ázirlenip otyr. Bul rette áleýetterdi iske asyrý, formaldy kedergilerdi joıý, ınvestıtsııalar úshin yntalylyq jasaý arqyly tartymdylyǵyn arttyrý qarastyrylady.
«Qujatta eń birinshiden, basym baǵyttardy aıqyndaý sharalary qamtylady. Qoldanystaǵy tájirıbe basym baǵyttardy aıqyndaýǵa ıkemdi bolmaı otyrǵanyn kórsetti. Árıne, bastapqyda bul jaqsy kóringen, alaıda damý aıasynda aımaqtardaǵy klasterlerde ondaı tetiktiń ıkemdiligin kóterý qajettiligi týyndady», - dedi Áset Isekeshev.
Mınıstrdiń sózine qaraǵanda, zań jobasymen arnaıy ekonomıkalyq aımaqtarda qyzmetin júzege asyratyn uıymdarǵa salyq salýda, sonyń ishinde jer salyǵy, korporatıvtik tabys salyǵy, múlik salyǵy jáne jer ýchaskelerin paıdalanǵany úshin tólemaqyny esepteý kezinde qatysýshylarǵa jeńildikter keńeıtilmek.
«Ekinshiden, Investıtsııalar jáne damý mınıstrligi bazasynda arnaıy ekonomıkalyq aımaqtardyń biryńǵaı úılestirý ortalyǵyn qurý kózdeledi. 2010 jylǵa deıin AEA ákimdiktermen basqarylyp keldi. Al jańa zań qabyldanǵan 2011 jyldan beri bul jumysty biz úılestirdik. Endigi kúni biryńǵaı standarttar engizý úshin úılestirýdi onan saıyn naqty qolǵa alý qajettigi týyndap otyr. Bul rette jobalardyń sapasyna baqylaý, basqarýdyń sapaly júıesin engizý kózdeledi», - dedi Áset Isekeshev.
