Arnaıy ekonomıkalyq aımaqtar Biryńǵaı úılestirý ortalyǵynan basqarylady - E. Saǵadıev
ASTANA. QazAqparat - Elimizde Arnaıy ekonomıkalyq aımaqtardy basqarý jónindegi Biryńǵaı úılestirý ortalyǵy qurylatyn bolady. Bul týraly búgin Májiliste «Qazaqstan Respýblıkasynyń keıbir zańnamalyq aktilerine arnaıy ekonomıkalyq aımaqtardy jetildirý máseleleri boıynsha ózgerister men tolyqtyrýlar engizý týraly» zań jobasynyń tanystyrylymynda Investıtsııa jáne damý vıtse-mınıstri Erlan Saǵadıev málim etti.
Vıtse-mınıstrdiń sózine qaraǵanda, zań jobasy aıasynda arnaıy ekonomıkalyq aımaqtardy basqarýdyń biryńǵaı úılestirý ortalyǵy qarastyrylyp otyr. Ázirshe, bundaı ortalyq «KAZNEXINVEST» AQ bazasynda basqarýshy kompanııalardyń memlekettik aktsııalar bóligin bere otyryp qurý usynylady.
«Biryńǵaı úılestirý ortalyǵynyń negizgi mindeti olardy basqarýdyń halyqaralyq standarttaryna aınaldyrý, bıznes-úderisterdi engizý, jańa qatysýshylar men ınfraqurylymdyq ınvestorlardy tartý boıynsha marketıngtik sharalar uıymdastyrý bolmaq. Budan bólek, zań jobasymen Arnaıy ekonomıkalyq aımaqtar qyzmetine qatysty birqatar júıeli problemalardy sheshý kózdeledi. Aımaqtardyń tıimdiligin arttyrýǵa, basqarýdyń jańa tetikterin engizýge, belgili bir maqsattar úshin shyǵyndardy ońtaılandyrýǵa baǵyttalǵan sharalar da qamtylady», - dedi E. Saǵadıev.
