Arnaıy ekonomıkalyq aımaqqa kirgen ınvestor shaǵyn jáne orta bıznesti damytýy qajet - depýtat
«Zań jobasy byltyr jeltoqsan aıtynda Májilistiń qaraýyna tústi. Biz búgin ony talqylap jatyrmyz. Ratıfıkatsııa kóbine radaktsııalyq túzetýlerge qatysty. Biz biletindeı, búginde bizdiń eldegi búkil arnaıy ekonomıkalyq aımaqtar toltyrylmaǵan ári jumystary úılestirilmegen. Buǵan múddeli keıbir elderdiń ınvestorlarynyń óz talaptary, bizdiń óz erejelerimiz bar degendeı. Ózderiniń jobasyn iske asyrýǵa nıetti kásipkerler bizge jıi shaǵymdanady, ıaǵnı zańnamanyń talaptary keıbir tustarda bir-birine qarama-qaıshy. Ózińiz biletindeı, úlken ıvestıtsııalyq jobalarda usaq-túıek qatelik degenge jol berilmeıdi. Osy olqylyqtarǵa baılanysty sheteldik ınvestorlar bizdiń elde jobalaryn iske asyra almaıdy, naryqqa kire almaı jatady», - dep málim etti Dınara Shúkijanova.
Onyń aıtýynsha, jaýapty organdar atalǵan zań jobasyna túzetýler engizý kezinde iri bıznespen qatar, shaǵyn jáne orta kásipkerlikke den qoıǵan.
«Máselen, bizdiń eldegi arnaıy ekonomıkalyq aımaqqa sheteldik ınvestor kirdi delik. Endi ol sol aımaqqa kásiporyn ashyp qana qoımaýy tıis. Investor sol ekonomıkalyq aımaqqa enetin aýmaqtardyń mańaıyndaǵy bızneske de qoldaý kórsetip, olardy damytýy qajet. Bul orta jáne shaǵyn bıznestiń nazardan tys qalmaıtynyn kórsetedi. Atalǵan zań jobasyn ratıfıkatsııalaýdyń artynda elimizdegi bıznes jobalardy damytý múddesi tur», - dep túsindirdi depýtat.
Onyń sózinshe, zań jobasyn ratıfıkatsııalaý EAEO-ǵa múshe elder arasyndaǵy biregeı jumys tártibin aıqyndap, yqshamdy jumys isteýge múmkindik beredi. Óz kezeginde bul bastama elge keltin kapıtaldyń artýyna yqpal etpek.
