Arnaıy bólimshelerdiń áskerı qyzmetshileri taýly daıyndyqtan ótýde

ALMATY. QazAqparat - Qazaqstan Qarýly kúshteriniń Taýly daıarlyq ortalyǵynda alpilik jáne barlaý bólimsheleri áskerı qyzmetshilerimen oqý-ádistemelik jıyndar ótti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Qarýly kúshterde jaýyngerlik oqý sharalary Memleket basshysynyń áskerdiń jaýyngerlik qabiletin túbegeıli arttyrý jónindegi tapsyrmasyn iske asyrý sheńberinde júrgizilý ústinde.

Jıynnyń negizgi maqsaty – taý kedergilerin eńserý mashyqtaryn jetildirý, bıik taýlarda kúrdeli jaǵdaıda jaýyngerlik is-qımyldar júrgizýdiń taktıkalyq ádisteri men tásilderin oryndaý.

Osyndaı sabaqtar barysynda jeke quram taýdaǵy daıarlyq deńgeıin jetildirip qana qoımaı, oqý-jaýyngerlik tapsyrmalardy oryndaý kezinde tózimdilikti, shydamdylyq pen tabandylyqty nyǵaıtady.

Birqatar áskerı qyzmetshiler taý daıarlyǵynan nusqaýshy retinde biliktiligin arttyryp, alpınızm boıynsha úshinshi jáne ekinshi razrıadtardyń normatıvterin oryndady.

Jıyndy qorytyndylaǵan Arnaıy operatsııalar kúshteriniń qolbasshysy polkovnık Bolat Jorabaev jeke quramnyń oqý baǵdarlamasyn sátti oryndaǵanyn atap ótip, áskerı alpınısterge sertıfıkattar men tós belgiler tabys etti.