Arnaıy bilimsiz aspaz bolý qıyn – Eńbek adamy

ASTANA. QazAqparat – Qysqa ólshemmen alsaq, adamnyń kóńil kúıi, úlken ólshemmen alsaq, densaýlyǵy ne iship, ne jegenine baılanysty. Osy turǵydan qaraǵanda aspaz deıtin eńbek adamdarynyń qoǵam ómirindegi mańyzy erekshe. El astanasyndaǵy «Qarlyǵash» balabaqshasynyń bas aspazy Lılııa Geramen tanysýymyz osy oıdy sanamyzǵa bekite túskendeı boldy.

Lılııa Gera – sheshe jaǵynan qýǵanda aspazdar áýletiniń úshinshi býyny.

«Qandaı mamandyq tańdaıtynyma bas qatyrmappyn da. Ájem aspsaz bolǵan Anam da aspaz. Men solardyń izimen kele jatyrmyn. As ázirleýge degen yntyzarlyqty boıyma anam darytty. Úıimizden qonaq arylmaıtyn. Sondyqtan ýaqytymyzdyń kóbi tamaq isteýge ketetin. Tamaq pisirýge solaısha áýestendim», - dep bastady ol áńgimesin.

53 jastaǵy aspaz ómiriniń 37 jylyn kásibı aspaz retinde ótkeripti. Ýchılışeni bitirgen boıda «Kazahselmash» zaýytynyń jumysshylaryn aspen qamdaıdy. Odan keıingi aspazdyq mansaby negizinen balabaqshalarda ótken. Arasynda bes jyl meıramhanada aspaz bolǵan kezi bar.

2011 jyldan beri «Qarlyǵash» balabaqshasynda taban aýdarmaı eńbek etip keledi.

«Balalar dıeta boıynsha tamaqtanýy kerek. Sondyqtan qant pen tuzdy meılinshe az qosamyz. Kóbinese býǵa pisiremiz, óıtkeni balanyń tamaǵy aǵzasyna eshbir zııan keltirmeýi kerek. Aspaz retinde balanyń as máziri maýsymǵa baılanysty túrlenip otyrý kerek dep esepteımin. Bizde mázirdi medıtsına mamany maquldap otyrady. Tamaqtyń qunary mindetti túrde esepke alynady», - deıdi bas aspaz.

Aspazdar mázirdi tyń taǵamdarmen jańartyp otyrýǵa tyrysady.

«Jańa bir as oılap tapsaq, balalarǵa qanshalyqty unaıtynyn tekseremiz. Balalar súıip jemese, mázirden alyp tastap otyramyz. Túshpara men mánti túıemiz, et asamyz. Óıtkeni balalar súıip jeıdi. Jalpy bala bitken úıdiń tamaǵyn izdep turady», - deıdi Lılııa Gera.

Onyń paıymynsha, aspaz tamaq isteýge shabytpen kirisýi kerek.

«Balalardyń tamaq unaǵanda qol bulǵap, bas barmaqtaryn kórsetkeniniń ózi qýanysh syılaıdy. Bir ul boldy, ashanadan tamaq taýsylǵansha shyqpaıtyn. Túri áli esimde. Bizben qatty dos bolyp ketken edi. Bizdiń jumysymyzdy negizgi baǵalaýshylar - osy balalar», - deıdi aspaz

Kánigi maman aspaz bolý úshin arnaıy bilimniń qajeti joq degen túsiniktiń jańsaq ekenin aıtady.

«Kez kelgen mamandyq arnaıy bilimdi qajet etedi ǵoı. Aspazdyq ta sondaı. Áýeli as ázirleıtin ónimder týraly eń qarapaıym dúnıelerdi bilýiń kerek. Árıne, qazir ınternetten qarap, kez kelgen tamaqty isteýge bolady. Biraq onyń bári foto men vıdeodaǵydaı bolyp shyǵa bermeıdi. Aspazdyqtyń óz qupııalary bar. Ony oqymaı meńgerý qıyn. Ár aspazdyń tamaq isteý tásili árqalaı. Bizdiń jaǵdaıda balalardy jan-tánińmen jaqsy kórý kerek. Súıispenshilikpen istegen tamaq juǵymdy bolady», - deıdi Lılııa Gera.