Arnaıy sý paıdalanýǵa ruqsat alý tolyqtaı tsıfrlyq formatqa kóshirildi
ASTANA. KAZINFORM — Jańa jyldan bastap azamattar arnaıy sý paıdalanýǵa ruqsatty Sý resýrstarynyń ulttyq aqparattyq júıesi (SRUAJ) arqyly ala alady. Jańa Sý kodeksine sáıkes bul memlekettik qyzmetti kórsetý qaǵıdalaryna ózgerister engizildi.
Sý resýrstary jáne ırrıgatsııa mınıstrligi málimetinshe, bıznes-protsesterdi ońtaılandyrý jáne avtomattandyrý osy qyzmetti kórsetýdiń búkil tsıklin tsıfrlyq formatqa tolyǵymen kóshirýge múmkindik berdi.
Byltyr sý paıdalanýǵa qatysty esepti tapsyrý da tsıfrlyq formatqa aýystyrylǵan bolatyn. Sonymen qatar SRUAJ 11 memlekettik aqparattyq júıemen ıntegratsııalandy.
Eske sala ketsek, Sý resýrstary jáne ırrıgatsııa mınıstrligi jerústi jáne jerasty sýy týraly barlyq málimet jınaqtalatyn Sý resýrstarynyń ulttyq aqparattyq júıesin ázirledi. SRUAJ-ny ónerkásiptik paıdalanýǵa engizý 2026 jyldyń ekinshi jartysyna josparlanǵan.
– Joba Memleket basshysy júktegen mindetterdi oryndaý aıasynda júzege asyrylyp jatyr. Aqparattyq júıede sý resýrstaryna qatysty barlyq derek ortalyqtandyrylǵan túrde jınaqtalady. Bul protsesterdi avtomattandyrýǵa jáne naqty derekter negizinde basqarýshylyq sheshimder qabyldaýǵa múmkindik beredi, – dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, sý shyǵynyn azaıtýǵa arnalǵan nemis tehnologııasyn engizý jobasy ázirlenip jatyr.
Infraqurylymnyń tozýynan aýyl sharýashylyǵynda sýdyń 40 paıyzyna deıin ysyrap bolady.