Almatyda 13 adam qaza tapqan hosteldiń basshysy ustaldy

30 qarashadaǵy «Almaty Hostel» ǵımaratyndaǵy órt oqıǵasyna baılanysty QR QK-niń 292-babynyń 3-bóligimen sotqa deıingi tergep-tekserý bastaldy, dep habarlaıdy Kazinform.

«Bas Prokýrordyń tapsyrmasyna sáıkes qylmystyq is arnaıy prokýrordyń is júrgizý óndirisine qabyldandy. Quqyq qorǵaý organdarynyń tájirıbeli qyzmetkerlerinen quralǵan vedomstvoaralyq jedel-tergeý toby quryldy. Órttiń shyǵý sebebi men alǵysharttaryn anyqtaý maqsatynda oqıǵa ornyna qarap-tekserý júrgizilip, saraptamalar taǵaıyndalyp, ózge de jedel-tergeý is sharalary uıymdastyrylyp jatyr. Sol kúni osy qylmysty jasady degen kúdikpen hosteldi jalǵa alýshy A.Mýhamedıarov prokýrorlarmen ustalyp, ýaqytsha ustaý ızolıatoryna oqshaýlandyryldy», - delingen QR Bas prokýratýrasynyń habarlamasynda.

Tergeý aıasynda hosteldiń qyzmet kórsetýine qatysy bolǵan barlyq tulǵalardyń áreketine quqyqtyq baǵa beriledi. Qylmystyq is tergeýi Bas Prokýrordyń baqylaýynda bolady. 

Eske salaıyq, 30 qarasha kúni Almatyda hostel órtenip, 13 adam qaza tapty.

Órtten zardap shekken adamdar qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy.

Órt shyqqan «Almaty Hostel» Halyk Bank menshigindegi ǵımaratta ornalasqany belgili boldy.

Qazaq tapqandardyń toǵyzy — qazaqstandyq, qalǵany sheteldikter ekeni anyqtaldy.

Keıin hostelde turyp jatqan stýdentter órt bastalǵan kezde ǵımarattan qalaı shyqqanyn aıtyp berdi. 

Sondaı-aq hosteldyń ıesi – «KÝSA Halyk» JShS. Ony jalǵa alǵan – «ALA Hostel» JShS. Jaldaý týraly kelisimshart bıyl 21 qyrkúıekte jasalǵany anyqtaldy.