Arnaıy prokýror Ońtústik Koreıanyń burynǵy prezıdentin 30 jylǵa bas bostandyǵynan aıyrýdy surady
ASTANA. KAZINFORM – Arnaıy prokýrorlar toby burynǵy prezıdent ıÝn Sok Eldi qastandyq isi boıynsha 30 jylǵa bas bostandyǵynan aıyrý jazasyn surady, dep habarlaıdy Yonhap aqparat agenttigi.
Arnaıy prokýror Cho Yn-Sýk basqarǵan sarapshylar tobynyń málimetinshe, burynǵy prezıdent 2024 jyldyń qazan aıynda Soltústik Koreıa tarapynan jaýap sharalaryn boldyrý maqsatymen Phenıan ústinen áskerı drondar ushyrýǵa buıryq bergen.
Tergeý nusqasy boıynsha, bul sol jyldyń jeltoqsan aıynda áskerı jaǵdaı engizý úshin syltaý retinde paıdalanylǵan.
Prokýrorlar sonymen qatar Seýl ortalyq aýdandyq sotyna burynǵy qorǵanys mınıstrin osy aıyp boıynsha 25 jylǵa bas bostandyǵynan aıyrý jazasyn taǵaıyndaý týraly ótinishpen júgindi.
Eske sala ketsek, ıÝn Sok El 2025 jyldyń shildesinen beri túrmede otyr. Ol 2024 jyldyń jeltoqsanynda áskerı jaǵdaı engizýdiń sátsiz áreketine baılanysty ekinshi ret qamaýǵa alyndy.
Bul – eks-prezıdentke qatysy bar segiz qylmystyq istiń biri.
Seýldiń ortalyq aýdandyq soty Ońtústik Koreıanyń burynǵy prezıdenti ıÝn Sok Elge 2024 jyldyń jeltoqsanyndaǵy búlik týraly is boıynsha ómir boıy bas bostandyǵynan aıyrý jazasyna kesti.
Sondaı-aq ol qamaýǵa alýǵa kedergi jasaý aıyby boıynsha ótken bólek sot protsesinde 5 jylǵa sottalǵan bolatyn.
