Arnaıy operatsııa: Quny 4 mlrd teńge bolatyn apıyn tárkilendi
Ótken aptada elimizdiń aýmaǵynda apıynnyń bir mıllıonnan astam bir rettik dozasy aınalymnan alyndy. Bul týraly Іshki ister mınıstrligi baspasóz qyzmetiniń ókili Shuǵyla Turlybek aıtty, dep habarlaıdy Kazinform.
«ІІM Esirtki qylmysyna qarsy is-qımyl departamenti prokýratýrasynyń úılestirýimen Batys Qazaqstan oblysynyń polıtsııasymen jáne kóliktegi polıtsııamen birlesip, quramynda kóknár sabany men apıynnyń qospalary bar taǵam kóknáriniń shetelden jetkizilý arnasynyń jolyn kesý boıynsha keń aýqymdy arnaýly operatsııany aıaqtady. Arnaýly maqsattaǵy bólimshelerdiń qoldaýymen qurylǵan jedel-tergeý toptary Oral, Aqtóbe, Shymkent jáne Almaty qalalarynyń aýmaǵynda Almatydan apıyn kóknárin satyp alyp, ony elimizdiń batysynda saýdalaǵan 8 adamdy ustady. Esirtki trafıgin Shymkent qalasynyń 50 jastaǵy turǵyny uıymdastyrǵan. Ol Aqtóbe men Oraldaǵy tórt dúkenniń ıesi bolyp shyqty. Sol arqyly kúdikti esirtki jasaýǵa arnalǵan kóknár sabany men ónerkásiptik eritkishti satqan», - dedi Shuǵyla Turlybek mınıstrliktiń baspasóz qyzmeti alańynda ótken brıfıngte.
Onyń dereginshe, polıtsııa bir mezgilde Astana, Almaty, Oral, Shymkent, Aqtóbe, Qostanaı, Kókshetaý, Rýdnyı qalalarynda 35 tintý is-sharasyn júrgizip, kúdiktilerdi ustady. Júrgizilgen arnaýly operatsııalar nátıjesinde qylmystyq toptyń 15 múshesi ustaldy. Olar 15 jyldan 25 jylǵa deıin bas bostandyǵynan aıyrylady.
«104 tonnadan astam kóknár sabany, 600-den astam «tropıkamıd» jáne «mıdeks» dárilik preparattarynyń bótelkeleri, shamamen 5 mln teńge, 4 avtokólik jáne DAF aýyr júk kóligi tárkilendi. Bul rette bir rettik doza úshin 0,2 gramm ekstraktsııalyq apıyn jetkilikti ekenin atap ótken jón. Osylaısha aınalymǵa apıynnyń bir mıllıonnan astam bir rettik dozasy jiberilmedi. Tárkilengen ónimniń quny 4 mlrd teńgege baǵalanady», - dedi ol.
