Arnaıy operatsııa barysynda Astana men Almatyǵa esirtki jetkizgen kúdikti ustaldy

ASTANA. KAZINFORM — Almaty qalasy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri Jambyl oblysy aýmaǵynan Almaty jáne Astana qalalaryna esirtki jetkizý arnasyn uıymdastyrǵan qylmystyq toptyń zańsyz áreketine tosqaýyl qoıdy.

Arnaıy qurylǵan tergeý-jedel toby polıtsııanyń arnaıy maqsattaǵy bólimshesiniń kúshtik qoldaýymen Jambyl oblysy aýmaǵyna issaparmen baryp, jedel is-sharalar júrgizdi.

Nátıjesinde 42 jastaǵy esirtki saýdasyna qatysy bar degen kúdikpen er adam ustaldy.

Sanktsııalanǵan tintý barysynda onyń turǵyn úıindegi jatyn bólmeden, tósek janyndaǵy týmbadan ózine tán ıisi bar ósimdik tektes zat salynǵan polıetılen paket tabylyp, tárkilendi.

Sot-saraptamasynyń qorytyndysyna sáıkes, tárkilengen zat gashısh bolyp shyqty.

Atalǵan derek boıynsha qylmystyq is qozǵaldy.

Sonymen qatar medıtsınalyq kýálandyrý nátıjesinde ustalǵan adamnyń esirtki zattaryn qoldanǵany anyqtaldy.

— Bul qylmystyq shema bizdiń qyzmetkerler tarapynan uzaq ýaqyt boıy muqııat pysyqtaldy. Jedel is-sharalardyń nátıjesinde Jambyl oblysy aýmaǵynan Almaty jáne Astana qalalaryna esirtki jetkizý arnasy toqtatyldy. Kúdikti ýaqytsha ustaý ızolıatoryna qamaldy. Qazirgi ýaqytta sotqa deıingi tergep-tekserý jalǵasýda. Qylmystyq shemaǵa qatysy bar barlyq tulǵalardy anyqtaý boıynsha jumystar júrgizilip jatyr, — dedi Almaty qalasy polıtsııa departamenti esirtki qylmysyna qarsy is-qımyl basqarmasynyń bastyǵy Murat Jumabaev.

Eske salsaq Qazaqstanda byltyr 12 tonnadan astam esirtki tárkilengen edi.