Arnaıy memlekettik qorǵa qaıtarylǵan qarajat esebinen 443 joba qarjylandyryldy

ASTANA. KAZINFORM — Arnaıy memlekettik qorǵa qaıtarylǵan qarajat esebinen 443 joba qarjylandyryldy. Bul týraly Úkimet otyrysynda Qarjy mınıstri Mádı Tákıev aıtty.

- Memlekettik bıýdjet shyǵystary – 94, respýblıkalyq bıýdjet shyǵystary – 93, jergilikti bıýdjet shyǵystary 97 paıyz atqaryldy. Respýblıkalyq bıýdjettiń negizgi shyǵystary: áleýmettik salaǵa – 6,5 trln teńge, óńirlerdi qoldaýǵa – 5,6 trln teńge, naqty sektorǵa 1,2 trln teńge baǵyttaldy. Aıta ketý kerek, búgingi kúni óńirlerdi qoldaýǵa baǵyttalǵan qarjat kólemi 74 paıyz boldy. Bul elimizdiń teńgerimdi áleýmettik-ekonomıkalyq damýyna yqpal etedi, - dedi ol.

Mınıstrdiń aıtýynsha, jergilikti bıýdjetter jalpy 9 trln teńgege áleýmettik sala men negizgi qyzmetterge basymdyq bere otyryp qarjylandyryldy.

- Áleýmettik-ekonomıkalyq jobalardy qarjylandyrýda Arnaıy memlekettik qorǵa qaıtarylǵan qarajat aıtarlyqtaı qoldaý boldy. Máselen, jalpy somasy 392 mlrd teńgege 443 joba qarjylandyryldy. Bul jobalardyń ishinde sýmen jabdyqtaýǵa baılanysty 248 jobaǵa 193 mlrd teńge, onyń ishinde aýyldyq eldi mekenderdegi 196 jobaǵa 141 mlrd teńge bólindi, - dedi Mádı Tákıev.

Mınıstrdiń dereginshe, densaýlyq saqtaý salasynda 129 mlrd teńge somasyna 177 joba, onyń ishinde 33,6 mlrd teńgege Óskemen qalasynda gematologııalyq ortalyq salý, jáne 28,1 mlrd teńgege Rıdder qalasynda kópbeıindi aýrýhana salý jobalary da bar. Sondaı-aq, sport salasynda 4 joba 33,1 mlrd teńge somasyna qarjylandyryldy.

Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salynyp jatyr.