Kaspııde qaza tapqan áskerı qyzmetshilerdiń otbasylaryna qarjy jınaý aıaqtaldy
ASTANA. KAZINFORM —Bul týraly Qazaqstan Halyq Keńesiniń múshesi, Mańǵystaý oblysy qoǵamdyq keńesiniń tóraǵasy Bekmurat Júsipov aıtty.
— Ózderińiz biletindeı, Memleket basshysy Qasym-Jomart Kemeluly Toqaevtyń tapsyrmasymen qaza tapqandardyń otbasylary men zardap shekken áskerı qyzmetshilerge jan-jaqty qoldaý kórsetilip jatyr.
Sonymen qatar, kelip jatqan qarajatty jınaqtaý maqsatynda arnaıy qor quryldy.
Osy qordyń qyzmetin baqylaý jónindegi komıssııaǵa jetekshilik etýdi maǵan, ıaǵnı Qazaqstan Halyq Keńesiniń múshesi, Mańǵystaý oblysy qoǵamdyq keńesiniń tóraǵasy Bekmurat Júsipovke senip tapsyryldy, - dedi ol.
Bekmurat Júsipovtiń málimetinshe qazirgi ýaqytta qorda qarajat jınaqtaldy.
— Bul Qazaqstan Halyq Keńesi músheleri, Quryltaı depýtattary, saıası partııalar, kásipkerler, demeýshiler jáne basqa da janashyr azamattarymyzdyń arqasynda múmkin bolyp otyr. Osyǵan baılanysty, qarajat jınaqtaý resmı túrde aıaqtaldy.
Arnaıy komıssııanyń jetekshisi retinde jaqyn arada osy jınalǵan qarajat qaza bolǵandardyń otbasylary men zardap shekkenderge ádiletti túrde jáne birkelki bólinetinin senimmen aıtamyn. Onyń ashyqtyǵyn Komıssııa quramyna kirgen memlekettik jáne quqyq qorǵaý organdarynyń ókilderi de qadaǵalaıdy. Atqarylyp jatqan jumystyń barysy týraly sizderge turaqty túrde habarlap otyramyn.
Qarjylaı kómek qaıǵynyń ornyn toltyra almaıtynyn túsinemiz. Degenmen osyndaı aýyr jaǵdaıda otbasylarǵa jan-jaqty qoldaý kórsetý — bizdiń paryzymyz dep bilemiz. Sizder bul aýyrtpalyqpen jalǵyz qalmaısyzdar. Senim bildirip, qaıǵyǵa ortaqtasqan barsha qazaqstandyqtarǵa alǵys aıtamyz, — dedi Bekmurat Júsipov.
Aıta ketelik arnaıy top barlyq derekti tekserip jatqany týraly jazǵan edik.
