Arnaıy HQKO-da daıyndalǵan qujattardy endi úıge jetkizýge bolady
ASTANA. KAZINFORM — Qazaqstanda arnaıy halyqqa qyzmet kórsetý ortalyqtarynda (arnaıy HQKO) daıyndalǵan qujattar men memlekettik nómirlerdi úıge jetkizý qyzmeti iske qosyldy.
«Azamattarǵa arnalǵan úkimet» memlekettik korporatsııasynyń málimetinshe, endi kólik ıeleri júrgizýshi kýáligin, kólikti tirkeý týraly kýálikti nemese memlekettik nómirdi alý úshin arnaıy HQKO-ǵa qaıta barmaıdy.
Daıyn qujatty nemese memlekettik nómirdi úıge jetkizýge HQKO qosymshasy arqyly tapsyrys berýge bolady. Qyzmet qujat rásimdelgen eldi mekende kórsetiledi.
Ótinim saǵat 17:00–ge deıin berilse, qujat sol kúni jetkiziledi. Al saǵat 17:00–den keıin berilgen ótinimder boıynsha jetkizý kelesi jumys kúni júzege asyrylady.
Tapsyrys berý úshin qosymshadaǵy «Arnaıy HQKO» bólimine kirip, «Daıyn qujattardy jetkizý» qyzmetin tańdaý qajet. Odan keıin jetkizý mekenjaıyn jáne qolaıly ýaqytty kórsetip, tólem jasaý kerek.
Paıdalanýshylar qosymsha arqyly tapsyrystyń oryndalý barysyn jáne kýrerdiń qaı jerde kele jatqanyn baqylaı alady.
Memlekettik korporatsııanyń aıtýynsha, jańa qyzmet azamattardyń ýaqytyn únemdep, daıyn qujattardy alýdy jeńildetedi.
Eske sala keteıik, buǵan deıin qazaqstandyqtar avtokólikke arnalǵan «ádemi» memlekettik nómirlerdi onlaın tańdap, tapsyrys bere alatyny habarlanǵan edi.
