Arnaıy ekonomıkalyq aımaqtardy sheteldik kompanııalar basqarýy múmkin
ASTANA. KAZINFORM – QR Premer-mınıstri Oljas Bektenov QR Ónerkásip jáne qurylys mınıstrligine óńdeý ónerkásibin qoldaý sharalaryn biryńǵaı júıege keltirýdi jáne arnaıy ekonomıkalyq aımaqtardy basqarý tásilderin ózgertý boıynsha usynystar daıyndaýdy tapsyrdy.
— Prezıdent óńdeý ónerkásibine tyń serpin berip, osy baǵytta júıesiz júrgizilip jatqan qoldaý sharalaryn retke keltirýdi tapsyrdy. Sondyqtan Ónerkásip mınıstrligi Ulttyq ekonomıka mınıstrligimen, «Báıterek» holdıngimen birlesip bir aı merzimde bytyrańqy jáne qaıtalanatyn tásilderdi alyp tastap, óńdeý ónerkásibin qoldaý sharalarynyń biryńǵaı júıelengen is-sharalar paketin ázirleýi qajet, — dedi ol Úkimet otyrysynda.
Sondaı-aq Bektenov arnaıy ekonomıkalyq aımaqtardy basqarýdy jeke, sonyń ishinde sheteldik kompanııalarǵa berý múmkindigin qarastyrýdy tapsyrdy.
— Arnaıy ekonomıkalyq aımaqtarǵa kóp úmit artylǵanyna qaramastan, atalǵan quraldardyń óńir ónerkásibin damytýǵa qosqan úlesteri qoıylǵan mindetterge sáıkes kelmeıdi. Ákimshilendirý men ınvestorlar tartýdyń jańa tásilderi esebinen arnaıy ekonomıkalyq aımaqtardyń tıimdiligin arttyrý qajet. Ónerkásip jáne qurylys mınıstrligi eki aı merzim ishinde arnaıy ekonomıkalyq aımaqtardy basqarýdy jeke, sonyń ishinde sheteldik kompanııalarǵa berý múmkindigin qarastyra otyryp, olardy basqarý tásilderin ózgertý boıynsha usynystar daıyndasyn, — dedi Úkimet basshysy.
Aıta keteıik, buǵan deıin Premer-mınıstr eldiń ekonomıka blogyna 10 naqty tapsyrma júktegen edi.
Sondaı-aq Tsıfrlyq damý mınıstrligi shuǵyl atqarýy tıis mindetterdi ataǵan edi.