Arnaıy baǵdarlama alaıaqtyq maqsattaǵy 49 mln qońyraýdy buǵattaǵan

ASTANA. KAZINFORM – Іshki ister mınıstrliginiń resmı ókili Shyńǵys Álekeshev kezekti brıfıngide telefon qońyraý men WhatsApp arqyly jasalatyn alaıaqtyqqa qandaı tosqaýyldar qoıylyp jatqanyn aıtty. 

«Bankter men memlekettik organdar qyzmetkerleriniń atynan jasalatyn telefon qońyraýlary jıilep ketti. Alaıaqtar jeke derekter men aqshańyzdy alý úshin bankterdiń, quqyq qorǵaý organdarynyń nemese basqa memlekettik organdardyń qyzmetkerleriniń atyn jamylyp, qońyraý shalady.

Baılanys operatorlarymen birlesip, mundaı qońyraýlarǵa tosqaýyl qoıyp jatyrmyz. Ol úshin arnaıy baǵdarlama jasalǵan. Osy baǵdarlama qoldanysqa engizilgen kúnnen bastap 49 mln-nan astam qońyraý buǵattaldy», - dedi resmı ókil.

Sonyń sózinshe, alaıaqtar azamattardy «qaýipsiz» shotqa aqsha aýdarýǵa nemese nesıe alýǵa kóndirý úshin WhatsApp messendjerin de paıdalanady.

«Bıyl osyndaı 2000-ǵa jýyq derek tirkeldi. Sondaı-aq, qaskóıler qashyqtan qol jetkizý qosymshalaryn ornatýdy jáne SMS-kodtardy jiberýdi suraýy múmkin. Bul alaıaqtarǵa sizdiń qarjyńyzdy basqarýǵa múmkindik beredi. Sondyqtan bul jerde de saq bolyńyzdar», - dedi Shyńǵys Álekeshev.