Arnaýly jıyn qatysýshylaryna áskerı shen berile me
NUR-SULTAN. QazAqparat - Qazaqstanda arnaýly áskerı jıyn qatysýshylaryna áskerı shen beriledi. Bul týraly QR Qarýly Kúshteri Bas shtaby basshysynyń orynbasary Serik Boranbaev aıtyp berdi, dep habarlaıdy QazAqparat tilshisi.
«Kezekti áskerı shen beriledi. Biraq, onyń jıynnan ótý qorytyndysy boıynsha beriletinin eskergen jón. Ony tıisti qolbasshylyq belgileıdi jáne solardyń ótinishimen jergilikti áskerı basqarý organdary sheshim qabyldaıdy», - dep túsindirdi Serik Boranbaev Ortalyq kommýnıkatsııalar qyzmetinde ótken brıfıngte.
Sonymen birge, spıker ákimderdiń óz aýmaǵyndaǵy qaýipsizdikti qamtamasyz etýge, strategııalyq nysandar men qoǵamdyq tártipti saqtaýǵa, azamattyq qorǵaý sharalaryn ótkizýge mindetti ekenin atap ótti.
«Qorǵanys mınıstri Nurlan Ermekbaev aıtqandaı, jergilikti atqarý organdarynyń basshylary jıyn ótkizý boıynsha jaǵdaıǵa qaraı derbes sheshim qabyldaıdy. Aýmaqtyq ásker Qarýly Kúshter quramyna kiredi, biraq olar naqty óńirdiń múddesine qaraı tıisti mindetterdi atqarýy kerek», - dedi Serik Boranbaev.
Aıta keteıik, 2 sáýir kúni Memleket basshysy Qasym-Jomart Toqaev áskerı mindettilerdi arnaýly jıynǵa shaqyrý týraly Jarlyq shyǵarǵan edi.
Arnaýly jıyn Qazaqstannyń birneshe óńirinde ǵana júrgiziledi .
Qazirgi ýaqytta respýblıka boıynsha 473 áskerı mindetti arnaýly jıynǵa shaqyrylǵan.
