Arnaýly salyq rejıminde salyq eseptiligin tapsyrý jáne salyq tóleý merzimderi qandaı
QR QM Memlekettik kirister komıtetiniń ókilderi árbir salyq rejıminde salyq eseptiligin tapsyrýdyń jáne salyq tóleýdiń merzimderi týraly aıtyp berdi, dep habarlaıdy QazAqparat.
Komıtet ókilderiniń aıtýynsha, patent negizinde arnaýly salyq rejımin qoldanatyn dara kásipkerler úshin Salyq kodeksinde bir aıdan bir jylǵa deıin patent qunynyń esep-qısabyn (911.00-nysan) usyný múmkindigi kózdelgen. Patent qunyn jáne áleýmettik tólemderdi tóleýdi salyq tóleýshi esep-qısapty tabys etkenge deıin júrgizedi.
Arnaýly mobıldi qosymshany paıdalana otyryp arnaýly salyq rejımin qoldanatyn jeke kásipkerler salyq eseptiligin usynbaıdy. Jeke tabys salyǵy jáne áleýmettik tólemder somasy aı saıyn arnaıy mobıldi qosymsha arqyly esepti aıdyń 15-inen keshiktirilmeı esepteledi jáne esepti aıdyń 25-inen keshiktirilmeı tólenedi.
Ońaılatylǵan deklaratsııa negizinde arnaýly salyq rejımin qoldanatyn salyq tóleýshiler deklaratsııany (910.00-nysan) salyq tóleýshiniń ornalasqan jeri boıynsha memlekettik kiris organyna birinshi jartyjyldyqqa 15 tamyzdan keshiktirmeı (25 tamyzdan keshiktirmeı tóleıdi), ekinshi jartyjyldyqqa 15 aqpannan keshiktirmeı (25 aqpannan keshiktirmeı tóleıdi) tabys etedi.
Bul rette, jumyskerlerdiń tabysynan jeke tabys salyǵyn jáne áleýmettik tólemderdi tóleýdi aı saıyn, tabystardy tólegen aıdan keıingi aıdyń 25-inen keshiktirmeı júrgizetinin atap ótý qajet.
Biryńǵaı jer salyǵyn tóleýshiler deklaratsııany (920.00-nysan) esepti jyldan keıingi jyldyń 31 naýryzynan keshiktirmeı jer ýchaskesi ornalasqan jerdegi salyq organdaryna tabys etedi.
Biryńǵaı jer salyǵyn, jer ústi kózderindegi sý resýrstaryn paıdalanǵany úshin tólemaqyny tóleý jer ýchaskesi ornalasqan jer boıynsha da mynadaı tártippen júrgiziledi:
1) esepti kezeńniń 1 qańtarynan 1 qazanyna deıin eseptelgen somalar-aǵymdaǵy esepti kezeńniń 10 qarashasynan keshiktirilmeıtin merzimde;
2) esepti kezeńniń 1 qazanynan 31 jeltoqsanyna deıin eseptelgen somalar – esepti kezeńnen keıingi esepti kezeńniń 10 sáýirinen keshiktirilmeıtin merzimde. 2022 jyldan bastap biryńǵaı jer salyǵynyń somasy jergilikti ózin-ózi basqarý bıýdjetine túsedi.
Jaldamaly qyzmetkerler úshin jeke tabys salyǵyn jáne áleýmettik tólemderdi tóleýdi tabys tólengen aıdan keıingi aıdyń 25-inen keshiktirmeı aı saıyn júrgizý qajet.
Bólshek salyqtyń arnaýly salyq rejımin qoldanatyn salyq tóleýshiler deklaratsııany (913.00-nysan) salyq tóleýshiniń ornalasqan jeri boıynsha salyq organyna esepti toqsannan keıingi ekinshi aıdyń 15-kúninen keshiktirmeı tabys etedi. Tólemdi esepti toqsannan keıingi ekinshi aıdyń 25-inen keshiktirmeı júrgizedi. Bul rette jaldamaly jumyskerlerdiń tabysynan jeke tabys salyǵyn jáne áleýmettik tólemder aı saıyn, tabystardy tólegen aıdan keıingi aıdyń 25-inen keshiktirilmeı tólenedi.
