Arnaýly oqý ornyndaǵy jastardyń kózinde ot bar - jattyqtyrýshy

- Jaısań kópsalaly kolledji damýy tejelgen, minezi qıyn, sonymen qatar balalar úıiniń tárbıelenýshileri bilim alatyn arnaýly oqý orny. Balalardy sportqa baýlýda qandaı qıynshylyqtarǵa tap bolasyzdar?

- Jaısań arnaýly mektep-ınternatynan, №7 arnaýly mektebinen damýy tejelgen balalar bizdiń kolledjde bilim alady. Olarmen jumys isteý qıyn emes. Olar da qarapaıym balalar, tek aqyl-esinde aýytqýlar bar. Bir jaqsysy, basqa balalarǵa qaraǵanda kolledjde bilim alatyn balalar shydamdy ári tabandy. Ata-anasy bar, baýyry bútin, aqyl-oıy qalypty balalar keıde selsoq júredi. Al myna balalardyń kózinde ot bar. Balalar uıaly telefonǵa úıir emes, teledıdardy kóp qaramaıdy. Bizdiń utatyn tusymyz da osy. Olar kez kelgen ýaqytta kolledj jataqhanasynan shyǵyp, oıynǵa aralasa alady. Men 20 jyldan beri Jaısańdaǵy arnaýly bilim ordasynda jumys istep júrmin. Qazir biz de bala sııaqtymyz. Olarmen teń dárejede sóılesip, birge oınaımyz. Mundaǵy oqýshylar qysym jasaǵandy unatpaıdy. Keıde fýtbol alańynda oıynshy almassa renjip, ashýlanady. Keıin basylyp qalady. Respýblıkalyq jarysqa barǵanda 8-9 oıynshyny alamyz. Sol kezde nege ol, nege men emes dep sóz talastyrady. Biz jarysqa baratyn oıynshylar quramyn jıi almastyryp otyramyz. Bul jerde jas sportshylarǵa psıhologııalyq turǵydan da kómek kórsetip jatamyz.

- Kolledj oqýshylary qaıda jattyǵady?

- Bizde «Olımp» sport kesheni bar. Kúndiz de, keshke de jattyǵa beremiz. Sport zal únemi ashyq turǵandyqtan dop qýyp, fýtbol oınaımyn degen balalarǵa eshqandaı shekteý joq. Jazda túngi saǵat onǵa deıin alańda júremiz. Qysta shaǵyn fýtbol oınaıdy. Oıynshylardyń yntasy joǵary. Bir jaǵynan kolledj oqýshylary jataqhanadaǵy bólmede ermek tappaı, sandalyp ketedi. Sol kezde bári dalaǵa shyǵyp, alańǵa keledi. Oınaı almaıtyndary da júredi. Eki jylda oqýshylardyń sheberligi shyńdalady.

- Kolledj oqýshylary jazǵy demalysqa shyǵa ma?

- Ata-anasy, úıi bar oqýshylar jazǵy demalysqa shyǵyp, otbasyna oralady. Al jetim balalar kolledjde qalady. Bizde 23 jetim, ata-ananyń qamqorlyǵynsyz qalǵan bala bar. Olar únemi jataqhanada bolady. Al kolledjde 254 oqýshy bar.

- Qyzdar sporttyń qaı túrimen shuǵyldanady?

- Qyzdar da fýtbol oınaıdy. Kolledjde fýtboldan erler arasynda eki komanda, al qyzdar arasynda bir komanda jasaqtalǵan. Úzdiksiz ýaqytpen sanaspaı jattyǵý jasaıtyn fýtbolshylardyń jetistigi de joǵary. 2015 jyly er balalar fýtboldan elimiz boıynsha birinshi oryn aldy, ótken jyly ekinshi orynǵa ıe boldy. Al fýtbolshy qyzdar arnaýly mektepter arasyndaǵy jarysta únemi birinshi oryn alyp keledi. Sóıtip olar Almaty, Astana, Óskemen, Atyraý sııaqty birneshe qalany kórdi. Jarys balalardyń yntasyn arttyrady. Jeńimpaz bolyp, oqý ornyna barǵan soń óz áserimen bólisedi. Sol kezde ózge oqýshylar yntalanyp, adamdarmen aralasyp, jer kórip, tanysý úshin bar kúshin salady. Fýtbolshylar quramy únemi ózgerip otyrady. Sebebi, kolledjde tek eki jyl bilim alady. Bizde voleıbol, basketbol, ústel tennısi de jaqsy damyǵan. Balalary bir jylda tennısti jetik meńgerip, oblystyq jarysqa 6 sportshy kelse, bári birinshi oryndy ıelenip qaıtady. Respýblıkalyq jarystardan da júldeli oralyp júrmiz. Sýda júzýden de jaqsy nátıjege qol jetkizdik.

- Basseın bar ma?

- Bizde basseın joq. Balalar jazda ózenge shomylyp, jetistikke jetip júr. Ótken jyly arnaıy bilim ordalary arasynda ótken respýblıkalyq jarys kezinde 5 oqýshy birinshi oryn aldy. Bıyl oblystyq baıqaý kezinde 21 medaldi jeńil aldyq. Onyń 11-i altyn.

- Jaısań kolledjinde qandaı mamandyqtar bar?

- Er balalar qurylysshy, qyzdar tiginshi mamandyǵyn meńgeredi. Kolledj oqýshylary arnaıy mamandyq ıelengen soń oqýyn qaıta jalǵastyrady. Keıbiri bolashaq mamandyǵyn sportpen baılanystyryp, orta, joǵary oqý oryndarynyń sport fakýltetine túsip jatatyndar kezdesedi.