Arnaýly memlekettik járdemaqylardyń alty túri ońtaılandyrylady

ASTANA. QazAqparat - Qazaqstanda arnaýly memlekettik járdemaqylardyń alty túri ońtaılandyrylady. Bul týraly búgin Senattyń Áleýmettik-mádenı damý jáne ǵylym komıtetiniń otyrysynda «Qazaqstan Respýblıkasynyń keıbir zańnamalyq aktilerine halyqty áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy. Aıta keteıik, zań jobasy Memleket basshysynyń bes ınstıtýtsıonaldyq reformasy aıasyndaǵy «100 naqty qadam» atty Ult josparynda qamtylǵan áleýmettik kómektiń ataýlylyǵyn kúsheıtý týraly tapsyrmasyn oryndaýǵa baǵyttalǵan.

Bul rette zań jobasy Ekonomıkalyq yntymaqtastyq uıymyna kiretin memleketter tájirıbesin eskere otyryp, jańa formattaǵy ataýly áleýmettik kómekti taǵaıyndaý kózdeledi. Osyǵan baılanysty, ataýly áleýmettik kómekter buǵan deıin berilip kelgen mólsherden kem bolmaýy úshin kedeıshilik sheginiń 40 paıyzynan 50 paıyzǵa qaraı kóteriledi. Jańa formattaǵy ataýly áleýmettik kómektiń taǵy bir ereksheligi eger otbasyndaǵy azamattar eńbek etýge qabiletti bolsa, onda kómek áleýmettik jumys usyný aıasyndaǵy kelisimshart negizinde jasalady. Bul rette otbasynyń eńbek etýge qabiletti músheleri jumyspen qamtýdyń belsendi sharalaryna qatysýǵa mindetti bolady. Eger eńbek etýge qabiletti azamattar mundaı sharalardan bas tartatyn bolsa, onda ataýly áleýmettik kómek tek otbasyndaǵy balalarǵa ǵana taǵaıyndalatyn bolady.

Budan bólek, tólemderge ákimshilik etýdi ońaılatý maqsatynda arnaýly memlekettik járdemaqylardyń 6 túri ońtaılandyrylady. Sonyń ishinde turmysy tómen otbasylardy qoldaýǵa arnalǵan jekelegen áleýmettik baǵdarlamalar boıynsha sharalardy kúsheıtý, tabysy az otbasylardy aıqyndaýda biryńǵaı tásil belgileý, kedeılik shegin ózgertý, ataýly kómektiń shartsyz nysanynan áleýmettik kelisimshart júıesine kóshirý kózdeledi.

Ana men balany qoldaý jónindegi sharalar keshenin kúsheıtý maqsatynda «Altyn alqamen», «Kúmis alqamen» marapattalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen marapattalǵan kóp balaly analarǵa arnalǵan arnaýly memlekettik járdemaqy kóp balaly analarǵa arnalǵan járdemaqyǵa ózgertiledi. Zań jobasyna sáıkes, atalǵan ózgeristerdiń barlyǵy 2018 jylǵy 1 qańtardan bastap qoldanysqa engiziledi.

Zań jobasy Senattyń aldaǵy ýaqytta ótetin jalpy otyrysyna shyǵarylady.