Arnaýly memlekettik organdardaǵy jaýapkershilikke qatysty ózgerister engizildi - zań jobasy

ASTANA. QazAqparat – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ulttyq qaýipsizdikti qamtamasyz etý jáne Qazaqstan Respýblıkasynyń arnaýly memlekettik organdaryndaǵy qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasyna Qazaqstan Respýblıkasy Parlamentiniń depýtattary bastamashylyq jasady.

Qujattyń maqsaty - ulttyq qaýipsizdikti qamtamasyz etý salasyndaǵy zańnamany odan ári jetildirý.

Onyń aıasynda túzetýler 2 kodekske jáne 11 zańǵa engiziledi.

«Birinshiden, qorǵanys-ónerkásip kesheni uıymdaryn strategııalyq obektilerge jatqyzý jáne qorǵanys pen qaýipsizdik muqtajy úshin taýarlar men qyzmetterdi satyp alý kezinde sybaılas jemqorlyq táýekelderine jol bermeýge septigin tıgizetin normalar engizilgen. Memlekettik qorǵanys tapsyrysyn oryndaýshyny tańdaý rásimin tek konkýrstyq negizde jáne ashyq júrgizý usynylyp otyr. Qaralyp otyrǵan qujatta qorǵanys-ónerkisibi kesheniniń kásiporyndary jekeshelengenniń ózinde de memlekettiń baqylaýynda qaldyrylatyn normalar qamtylǵan», - dedi Májilis depýtaty Aıgúl Quspan.

Onyń aıtýynsha, arnaýly memlekettik organdary qyzmetkerleriniń qyzmettik tártibine jáne áleýttik qorǵalýyna qatysty túzetýler engizý eskerilgen.

Qazaqstan Respýblıkasynyń arnaýly memlekettik organdary týraly zańynyń qoldanystaǵy redaktsııasynda qyzmettik tártipti saqtaý mindeti birinshi basshylarǵa ǵana júktelgen edi.

Endi arnaýly memlekettik organdarda qyzmettik tártip úshin jaýapkershilikti tek jeke dara birinshi basshylarǵa ǵana emes, barsha bólimshe basshylaryna da júkteý usynylyp otyr.

Buǵan qosa, zań jobasyna sáıkes ulttyq qaýipsizdik organdaryna kadr quramyn patrıottyq, adamgershilik jáne rýhanı turǵydan tárbıeleýge jáne ulttyq qaýipsizdik organdarynda quqyq buzýshylyqtyń aldyn alýǵa baǵyttalǵan jumysty júzege asyrý jónindegi mindetter júkteledi.

«Jeke qurammen júrgiziletin bul jumys ulttyq mádenıetke, dástúrge, memlekettik tildi bilýge, jaýyngerlik rýhty nyǵaıtýǵa, ujymdaǵy adamgershilik ahýaldy saqtaýǵa baǵyttalady», - dedi depýtat.

Onyń sózine qaraǵanda, zań jobasyndaǵy birqatar normalar áskerı qyzmetti atqarý tártibin jaqsartýǵa arnalǵan.

«Dinı ekstremızmniń aldyn alýdy zańdy turǵyda retteý usynylyp otyr. Qazirgi kezde zańnamaǵa sáıkes memlekettik jáne jergilikti atqarýshy organdarǵa terrorızmge toıtarys berý, onyń saldarymen kúresý ǵana júktelgen. Onyń dinı aspektileri múldem qarastyrylmaǵan. Osy sebepti terrorızmge qarsy kommıssııa aıasynda jergilikti atqarýshy organdarǵa dinı ekstremızmdi aldyn alýdy júzege asyrý jónindegi ókilettik berý qajet. Al, terrorızmge qarsy ortalyq osy jumystardy úılestirip, oǵan bas-kóz bolýy shart dep esepteımiz», - dedi Aıgúl Quspan.