Arnaýly salyq rejımine engender JK tirkemeı-aq 4% tólem arqyly jumys isteıdi
ASTANA. KAZINFORM – 2026 jyly arnaýly salyq rejımine kiretin ózin-ózi jumyspen qamtýshylardyń tizimi jarııalanǵanyn jazdyq. Endi shashtarazdan bastap taksıske deıingi myńdaǵan adam aıyppulsyz, kassa men esep-qısapsyz, tek 4% biryńǵaı áleýmettik tólem aýdarý arqyly zańdy túrde jumys isteı alady.
Arnaıy salyq rejımi qalaı jumys isteıdi?
Bir sózben aıtqanda, arnaýly salyq rejımi – bıýrokratııasyz jumys isteýdiń eń jeńil joly. 2026 jyldyń 1 qańtarynan bastap, 7 túrli arnaýly salyq rejımi qysqartylyp, 3 ámbebap rejım ǵana qalady. Solardyń biri – «Ózin ózi jumyspen qamtýshylarǵa arnalǵan arnaýly salyq rejımi».
Bul rejımge óz eńbegin jaldamaly qyzmetkerlerdi paıdalanbaı usynatyn, jeke kásipker nemese zańdy tulǵa sanatyna jatpaıtyn ózin-ózi jumyspen qamtýshylar kiredi. Olardyń ózi Úkimet bekitken arnaıy tizbedegi 40 túrli qyzmettiń kez kelgenimen aınalysý kerek.
Tólem mólsheri men shegi
Aı saıynǵy tabys shegi: 300 aılyq eseptikkórsetkish mólsherinde (shamamen 1,25 mln teńge).
Jyldyq tabys shegi: 15 mln teńge.
Salyq salynbaıdy, biraq tabysynyń 4%-y áleýmettik tólemder (zeınetaqy, MÁMS, áleýmettik aýdarymdar) retinde ustalady.
Eń bastysy, qosymsha deklaratsııa, kassa apparaty, býhgalterlik esep júrgizýdiń qajeti joq. Bári mobıldi qosymsha arqyly avtomatty esepteledi.
Qaı qyzmet túrleri qoldana alady?
Shashtaraz, tyrnaq sheberleri, tiginshiler, fotograftar, jóndeýshiler, qolónershiler, kýrerler, taksı júrgizýshiler jáne jeke klıentke qyzmet kórsetetin ózge mamandar. Basqasha aıtqanda, buryn «jasyryn» isteıtin frılanserler endi zańdy túrde jumys isteı alady.
Tolyq tizbe mynandaı:
- Mal sharýashylyǵyn damytatyn qyzmet
- Mýzykalyq aspaptar óndirisi
- Árleý (qabyrǵany sylaý) jumystary
- Aǵash jáne jıhaz jasaý jumystary
- Eden tóseý jáne qabyrǵalardy qaptaý
- Boıaý jáne shyny jumystary
- Jelilik marketıng arqyly júrgiziletin bólshek saýda
- Taksı qyzmeti
- Poshta jáne kýrerlik qyzmetter
- Daıyn tamaq jetkizý qyzmeti
- Jeke nemese jalǵa alynǵan turǵyn úıdi jalǵa berý (sýbarenda) jáne basqarý
- Fotografııa salasyndaǵy qyzmet
- Aýyzsha jáne jazbasha aýdarma qyzmeti
- Veterınarlyq qyzmet
- Basqa turmystyq taýarlardy jalǵa berý jáne lızıng
- Turǵyn úıdi tazalaý
- Basqa qosymsha kommertsııalyq qyzmetter, basqa toptarǵa kirmeıtin
- Sport jáne demalys salasyndaǵy bilim berý
- Mádenıet salasyndaǵy bilim berý
- Basqa bilim berý qyzmetteri, basqa toptarǵa kirmeıtin
- Kórkem jáne ádebı shyǵarmashylyq
- Kompıýterler men perıferııalyq jabdyqtar jóndeý
- Baılanys jabdyqtaryn jóndeý
- Elektrli turmystyq tehnıka jóndeý
- Úı jáne baqsha jabdyqtaryn jóndeý
- Aıaq kıim jóndeý
- Tabıǵı jáne jasandy bylǵarydan jasalǵan galantereıa buıymdaryn jóndeý
- Jıhaz jáne ınterer zattaryn jóndeý
- Saǵat jóndeý
- Zergerlik buıym jóndeý
- Trıkotaj jáne toqylǵan buıymdardy jóndeý
- Tigin buıymdaryn, bas kıimder men tekstıl galantereıa buıymdaryn jóndeý
- Túkti jáne bylǵary buıymdardy, bas kıimderdi jóndeý
- Mýzykalyq aspaptardy jóndeý
- Kilem jáne kilem buıymdaryn jóndeý
- Velosıped jóndeý
- Basqa turmystyq taýarlardy, jeke tutyný buıymdaryn jóndeý, basqa toptarǵa kirmeıtin
- Shashtaraz jáne sulýlyq salony qyzmeti
- Úı sharýashylyqtarynyń úı qyzmetkerlerin jaldaý qyzmeti
- Úı sharýashylyqtarynyń ózi tutyný úshin taýar óndirýi
Qalaı tirkelý kerek?
- eGov Mobile nemese e-Salyq Azamat qosymshasyna kiresiz
- «Ózin-ózi jumyspen qamtýshy retinde tirkelý» qyzmetin tańdaısyz
- Joǵarydaǵy kesteden qyzmet túrin (EQJJ) tańdaısyz
- Osymen tirkelý aıaqtalady
- Eshqandaı qujat kerek emes, tek ETsQ nemese SMS-kod jetkilikti.
- Aı saıyn tabystyń 4%-yn tóleý.
Mysaly, siz tyrnaq sheberisiz deıik. Úıde klıent qabyldap, aıyna 200-300 myń tabasyz. Osy tabysyńyzdan 4% áleýmettik tólem aýdaryp, zańdy jumys isteı alasyz. Taksı júrgizýshileri de jeke tulǵa retinde jańa tizim boıynsha tirkelip, aıyppulsyz jumys isteı alady.
Bir klıentten artyq tabys tapsa ne bolady?
Eshteńe bolmaıdy. Shekteý jyldyq tabysqa qatysty.
Klıent túbirtek surasa ne isteý kerek?
Bul rejımdegiler chek berýge mindetti emes.
Zeınetaqy jınala ma?
Iá, óıtkeni tabystyń 4%-yn áleýmettik tólem retinde aýdarasyz.