Arnaýly salyq rejıminde qandaı ózgerister bar

ASTANA. KAZINFORM — QM Memlekettik kirister komıtetiniń Arnaýly salyq rejımi ákimshilendirý basqarmasynyń basshysy Erqanat Shyńbergen jańa Salyq kodeksine arnaýly salyq rejımi boıynsha engizilgen túzetýler boıynsha túsinik berdi. 

Jańa Salyq kodeksin ázirleý kezinde arnaýly salyq rejımderin (ASR) ońtaılandyrý júrgizildi.

— Máselen, jańa Salyq kodeksinde tabysy kóp emes, sondaı-aq jaldamaly jumyskerlerdi tartpaı-aq qyzmetin kezeń-kezeńimen júzege asyratyn adamdardy qoldaý maqsatynda (onyń ishinde qyzmetti platformalyq jumyspen qamtý arqyly júzege asyratyn adamdar úshin) ózin-ózi jumyspen qamtyǵandar úshin ASR kózdelgen, — dedi Erqanat Shyńbergen.

Osy ASR qyzmetin platformalyq jumyspen qamtý arqyly júzege asyryp, arnaıy mobıldik qosymshany paıdalana otyryp patent negizinde ASR qoldanatyn adamdar (Qazaqstan Respýblıkasynyń azamattary, qandastar), onyń ishinde mynadaı ólshemsharttarǵa sáıkes bolǵan kezde basqa da adamdar qoldanýǵa quqyly:

— jeke kásipkerler emes;

— qyzmette jaldamaly jumyskerlerdiń eńbegin paıdalanbaıdy;

— Úkimet qaýlysymen osy rejımdi qoldanýǵa ruqsat etilgen qyzmet túrlerin júzege asyrady;

— bir aıda tabysy AEK-tiń 300 eselengen mólsherinen aspaıtyn (2026 jyly 1,3 mln teńge).

— Osy rejımdi qoldanatyn adamdardyń mindettemelerdi oryndaýy mynalarmen barynsha jeńildetildi. Birinshiden, jeke kásipker retinde tirkelý mindetinen bosatyldy. Ekinshiden, tabys salyǵyn tóleýden tolyq bosatylǵan. Úshinshiden, bul sanattaǵy adamdar úshin jalǵyz mindetteme — tabystyń 4% mólsherinde áleýmettik tólemderdi tóleý (mindetti zeınetaqy jarnalary, jumys berýshiniń mindetti zeınetaqy jarnalary, áleýmettik salyq jáne mindetti áleýmettik medıtsınalyq saqtandyrý 1%-dan). Bul tártip ózin-ózi jumyspen qamtyǵandarǵa saqtandyrý jaǵdaıy bastalǵan kezde, zeınetaqymen qamsyzdandyrýdy, medıtsınalyq jáne áleýmettik saqtandyrýdy qosa alǵanda, bazalyq áleýmettik kepildikterdi qamtamasyz etedi, — dedi basqarma basshysy.

Onyń aıtýynsha, osy sanattaǵylar salyq eseptiligin usynýdan bosatyldy. Olar úshin mindettemelerdi oryndaýdy ońaılatýy baǵytynda arnaıy mobıldi qosymshany qoldaný kózdelgen.

— Tıisti platformamen (ıAndeks, Wolt, Glovo, InDrive) jumyspen qamtylǵandar boıynsha, ıaǵnı ózin-ózi jumyspen qamtyǵandarǵa qatysty áleýmettik tólemderdi ustap qalý men aýdarýdy ınternet-platforma operatory platforma arqyly alynǵan kiris boıynsha júrgizetin bolady. Osy rejımdi qoldanýda kórsetilgen artyqshylyqtary ózin-ózi jumyspen qamtyǵandardyń qyzmetin zańdastyrýǵa, áleýmettik kepildikterdi qamtamasyz etýge (zeınetaqy, medıtsınalyq jáne áleýmettik qorǵaýǵa qol jetkizýge) baǵyttalǵan, — dedi Erqanat Shyńbergen.

Jeńildetilgen deklaratsııa negizindegi ASR

Shaǵyn jáne orta bıznes sýbektileri úshin jańa Salyq kodeksinde salyq mindettemelerin oryndaýdy ońaılatý jáne salyq júktemesin azaıtý maqsatynda jeńildetilgen deklaratsııa negizindegi ASR qarastyrylǵan. Bul rejımdi kelesi sharttarǵa sáıkes keletin salyq tóleýshiler qoldanýǵa quqyly:

1) jyldyq tabysy 600 myń eselengen AEK-ten aspaıtyn (2026 jyly 2,5 mlrd teńge);

2) rejımdi qoldanýǵa tyıym salynatyn tizbeshe engizilmegen qyzmet túrlerin júzege asyratyndar (Úkimet qaýlysymen aıqyndalady).

— Osy rejımdi qoldanýdyń artyqshylyǵy bar. Birinshiden, qyzmette tartylatyn jumyskerler sanyn zańdastyrý úshin jaldamaly jumyskerler sany boıynsha shekteý joq. Ekinshiden, bıznesti bólshekteý joldaryna barmaý úshin, óte qomaqty tabys mólsheri eskerilgen. Bul turǵyda qyzmetten túsetin barlyq kiristi zańdastyrýǵa yqpal etetin kirister boıynsha eń joǵary meje belgilendi. Atap aıtqanda, biryńǵaı salyq stavkasy (KTS/JTS) — 4%. Máslıhattardyń sheshimimen stavkany 50%-ǵa deıin tómendetý nemese arttyrý múmkindigi bar, — dedi basqarma basshysy.

Onyń aıtýynsha, rejımdi qoldanýdyń tartymdy jaǵdaılaryn jasaý úshin QQS-tan jáne áleýmettik salyqty tóleýden bosatý túrindegi jeńildik bar. Sonymen qatar, jylyna 135 myń eselengen AEK-ke (550 mln teńge) deıingi tabysy bar jeke kásipkerlik býhgalterlik esepti júrgizýden bosatylǵan. Mindettemelerdi oryndaýdy jeńildetý maqsatynda jylyna 2 ret jeńildetilgen deklaratsııany tapsyrý talaby eskerilgen.

Fermerlerge arnalǵan qoldanystaǵy ASR tártibi

— Jańa Salyq kodeksindegi sharýa nemese fermer qojalyqtaryna arnalǵan ASR boıynsha eleýli ózgeris joq. Biryńǵaı jer salyǵynyń (BJS) joıylýyna baılanysty mundaı sharýashylyqtar endi jeke tabys salyǵyn (JTS) burynǵy sharttarda jáne sol mólsherlemeler boıynsha tóleıtin bolady, — dedi Erqanat Shyńbergen.

Bul rette JTS-tiń tómen mólsherlemesi — jalpy kiristen 0,5%. Al salyq deklaratsııasy jylyna bir ret tapsyrylady.

Rejımniń artyqshylyǵy aıasynda mynadaı salyqtar men tólemderdi tóleýden bosatý qarastyrylǵan:

— aýyl sharýashylyǵy qyzmetinde paıdalanylatyn jer ýchaskesin boıynsha jer salyǵy nemese tólemaqy;

— aýyl sharýashylyǵynda paıdalanylatyn kólik quraldaryna salynatyn salyq;

— múlikke salynatyn salyq;

— QQS;

— áleýmettik salyq;

— qorshaǵan ortaǵa teris áser etkeni úshin tólem.

Eske salsaq, bıyl shilde aıynda Memleket basshysy jańa Salyq kodeksine qol qoıdy.